सिद्धलेकमा करार र ज्यालादारी कर्मचारीको सेवा थप नहुने

धादिङ । सिद्धलेक गाउँपालिकाले दरबन्दीभन्दा बाहिर रही ज्यालादारी तथा करार सेवामार्फत कार्यरत कर्मचारीहरूको सेवा साउन १ गतेदेखि निरन्तरता दिन नसकिने जनाएको छ।

गाउँपालिकाको प्रमुख प्रशासकीय अधिकृत अनिशा आचार्यद्वारा जारी सूचनामा बागमती प्रदेश स्थानीय सेवा (गठन तथा सञ्चालन) ऐन, २०७९ को दफा १६ अनुसार स्थानीय सेवाका कर्मचारीले गर्नुपर्ने कार्यका लागि कुनै पनि व्यक्तिलाई ज्यालादारी वा करारमा नियुक्ति गर्न नपाइने कानुनी व्यवस्था रहेको उल्लेख गरिएको छ।

सूचनाअनुसार ऐनको दफा १६ को उपदफा (२) मा कानुन विपरीत ज्यालादारी वा करारमा नियुक्ति गरिएमा त्यस्ता व्यक्तिले प्राप्त गरेको तलब, भत्ता तथा अन्य सुविधा नियुक्ति गर्ने कर्मचारी वा पदाधिकारीबाट सरकारी बाँकी सरह असुलउपर गरिने व्यवस्था रहेको छ।

उक्त कानुनी व्यवस्थाको कार्यान्वयनका लागि गाउँपालिका, गाउँ कार्यपालिकाको कार्यालय मातहतका वडा कार्यालय तथा स्वास्थ्य शाखाअन्तर्गतका स्वास्थ्य संस्थाहरूमा दरबन्दीभन्दा बाहिर रही कार्यरत कर्मचारीहरूको सेवा २०८३ साउन १ गतेदेखि अर्को व्यवस्था नभएसम्म थप गर्न नसकिने जनाइएको छ।

साथै, सो मितिपछि दरबन्दीभन्दा बाहिरका कर्मचारीलाई हाजिर गराएको वा स्वयं हाजिर भएको पाइएमा त्यसको सम्पूर्ण जिम्मेवारी सम्बन्धित कार्यालय प्रमुख, शाखा प्रमुख वा हाजिर गराउने पदाधिकारी स्वयंले व्यहोर्नुपर्ने सूचनामा उल्लेख छ।

गाउँपालिकाले त्यस्ता कर्मचारीहरूको तलब, भत्ता तथा अन्य सुविधा भुक्तानी गर्न नसकिने तथा यस विषयमा गाउँपालिका कार्यालय कुनै पनि प्रकारले जिम्मेवार नहुने स्पष्ट पारेको छ।