सिद्धलेक-७ मा कर्मचारी हटाइएको विषयलाई लिएर स्थानीयवासी आन्दोलित,वडा कार्यालयमा तालाबन्दी

धादिङ- सिद्धलेक गाउँपालिका-७ मा कर्मचारी हटाइएको विषयलाई लिएर स्थानीयवासी आन्दोलित भएका छन्।

कर्मचारी शान्ति मगरातीलाई सेवाबाट हटाउने निर्णय फिर्ता गरी पुनर्बहाली गर्न माग गर्दै स्थानीयले सोमबार वडा कार्यालयको मुख्य ढोकामा अनिश्चितकालीन तालाबन्दी गरेका हुन्।

तालाबन्दीपछि वडा कार्यालयबाट प्रदान हुँदै आएका दैनिक प्रशासनिक सेवासमेत प्रभावित भएका छन्। मगराती तत्कालीन नलाङ, सलाङ र कुम्पुर गाविसमा जिल्ला विकास समितिमार्फत २०६७ सालमा नियुक्त भएका तीन कर्मचारीमध्येकी एक हुन्।

उनी पछिल्लो समय सिद्धलेक-७ मा कार्यरत रहनुका साथै वडा सचिवको जिम्मेवारीसमेत सम्हाल्दै आएकी थिइन्। तर गाउँपालिकाकी प्रमुख प्रशासकीय अधिकृत अनिशा आचार्यले साउन ६ गते पत्रमार्फत उनको करार म्याद थप नगर्ने निर्णय जानकारी गराएकी थिइन्।

गाउँपालिकाले दरबन्दीभन्दा बाहिर करारमा रहेका कर्मचारीको म्याद नथप्ने गाउँपालिकाको ४२औँ निर्णयअनुसार मगरातीको सेवा निरन्तरता रोकिएको जनाएको छ।

तर स्थानीयवासी भने यो निर्णय प्रशासनिक कारणले मात्र नभई बालुवा प्रशोधन केन्द्रसँग जोडिएको विवाद र व्यक्तिगत पूर्वाग्रहका कारण भएको आरोप लगाइरहेका छन्।

स्थानीयका अनुसार सिद्धलेक-७ पिपलटारका विशाल गिरी ‘रुद्रबहादुर’ले सञ्चालन गर्दै आएको फिरफिरे अर्थात् बालुवा प्रशोधन केन्द्रको विषयलाई लिएर गाउँपालिका अध्यक्ष परशुराम खतिवडा र गिरीबीच लामो समयदेखि विवाद थियो।

गत असार ३२ गते नेपाली कांग्रेसको गाउँपालिका समितिको बैठकमा यही विषयलाई लिएर विवाद चर्किएको र सो क्रममा गिरीले अध्यक्ष खतिवडामाथि हातपात गरेको स्थानीयको भनाइ छ।

घटनापछि गिरी पक्राउ परेका छन्। स्थानीयको दाबीअनुसार उक्त बालुवा उद्योग सञ्चालनका लागि वडा कार्यालयबाट सिफारिस तथा विद्युत् मिटर जडानका लागि नेपाल विद्युत् प्राधिकरणमा सिफारिस गरेको विषयलाई लिएर कर्मचारी मगरातीलाई निशाना बनाइएको हो।

अझ महत्वपूर्ण कुरा-मगरातीसँगै २०६७ सालमा नियुक्त भएका अन्य दुई कर्मचारीले भने सेवा निरन्तरता पाएका छन्। त्यसैले आफूहरूमाथि विभेद भएको स्थानीयको आरोप छ।

साउन ६ गतेदेखि नै समस्या समाधानका लागि गाउँपालिकाले पटक-पटक आश्वासन दिए पनि माग सम्बोधन नभएपछि बाध्य भएर वडा कार्यालयमा तालाबन्दी गर्नुपरेको स्थानीयले बताएका छन्।

यस विषयमा वडा अध्यक्ष सानु गिरीले आफू केही दिनदेखि पारिवारिक कामका कारण काठमाडौंमा रहेको र वडा कार्यालयमा तालाबन्दी भएको जानकारी पाएको बताउनुभयो।

उहाँले कर्मचारीसम्बन्धी स्थानीयको चासो र मागलाई गाउँपालिकाले तत्काल सम्बोधन गर्नुपर्ने बताउनुभयो ।

स्थानीयवासीले शान्ति मगराती पुनर्बहाली नभएसम्म तालाबन्दी नखोल्ने बताएका छन्। जबर्जस्ती ताला खोल्ने प्रयास भए कडा प्रतिरोध गर्ने चेतावनीसमेत उनीहरूले दिएका छन्। तर वडा कार्यालय बन्द हुँदा दैनिक सेवा लिन पुगेका सर्वसाधारण सेवाग्राही भने प्रत्यक्ष मारमा परेका छन्।