देशभर ९२ प्रतिशत रोपाइँःअझै केही दिन रोपाइँ गर्न सकिने तर उत्पादन कम हुने विज्ञको भनाई

धादिङ,०५ भदौ।
देशभर ९२ प्रतिशत रोपाइँ भएको छ ।गत वर्षको तुलनामा यसवर्ष ३ प्रतिशत कम धान रोपाइँ भएको कृषि तथा पशुपक्षी विकास मन्त्रालयले जनाएको छ।

मन्त्रालयका अनुसार सबैभन्दा बढि कर्णाली र सुदूरपश्चिममा सबैभन्दा धेरै ९९ प्रतिशत रोपाइँ भएको छ । अन्नको भण्डार मानिने मधेस प्रदेशमा अघिल्लो वर्षको तुलनामा यसवर्ष रोपाइँ ११ प्रतिशतले कम छ ।

मधेसमा ८२ प्रतिशतमात्रै रोपाइँ भएको छ ।त्यस्तै कोशीमा ९७ प्रतिशत, बाग्मतीमा ९३ प्रतिशत, गण्डकीमा ९४ प्रतिशत, लुम्बिनीमा ९५ प्रतिशत रोपाइँ भएको छ ।गएको वर्ष साउन सकिँदा देशभर ९५ प्रतिशत क्षेत्रफलमा रोपाइँ भएको थियो।

यस वर्ष मनसुनले साथ नदिएको र लम्पी स्किन रोगका कारण गोरु सङ्क्रमित हुँदा रोपाइँको काम प्रभावित भयो । धेरै धान उत्पादन हुने मधेस प्रदेशमा नै यसपालि सबैभन्दा कम प्रतिशत रोपाइँ भएको छ।

गएको वर्ष मधेसमा साउन सकिँदा झण्डै ९३ प्रतिशतसम्म रोपाइँ भएको थियो । अझै केही दिन रोपाइँ गर्न सकिने तर अब रोपिएको धानबाट उत्पादन कम हुने विज्ञले बताएका छन् ।यसपालि धानको उत्पादन घट्ने अनुमान छ ।

नेपालले गर्दै आएको धान/चामलको आयात थप बढ्नेछ।