आफ्नै छोरीलाई जबरजस्ती करणी गर्ने बुबा पक्राउ

धादिङ,१३ श्रावण।
आफ्नै छोरीलाई जबरजस्ती करणी गरेको कसुरमा दाङका एक पुरुष पक्राउ परेका छन्।

दाङ जिल्ला घर भएका ४५ वर्षीय बाबुले १७ वर्षीया छोरीलाई पटक पटक बलात्कार गरेको भन्दै कारबाहीको माग गर्दै पीडितले बुधवार जिल्ला प्रहरी कार्यालय धादिङमा उजुरी दिएकी थिइन्।

आरोपितलाई दाङको घोराही उपमहानगरपालिका–१९ बाट आफन्तकोमा लुकीछिपी बसिरहेको अवस्थामा पक्राउ गरिएको जिल्ला प्रहरी कार्यालयका सूचना अधिकारी सन्तुलालप्रसाद जैसवारले बताए ।

पीडित र आरोपित दुवै धादिङको धुनिवेशी नगरपालिका–१ जीवनपुरस्थित एक इँट्टा उद्योगमा काम गर्ने मजदुर हुन् ।

मजदुरीको सिलसिलामा इँट्टा उद्योगमा २०७९ पुसदेखि २०८० वैशाख ११ गतेसम्म सँगै काम गर्दै छोरीसँग एउटै कोठामा बस्दै आएका थिए।त्यसैक्रमा छोरीमाथि पटकपटक जबरजस्ती करणी भएको पीडित नाबालिकाको जाहेरीमा उल्लेख भएको प्रहरी नायब उपरीक्षक जैसवारले बताए।

पीडितको गर्भमा ५ महिनाको बच्चा रहेकोले धादिङ अस्पतालमा बुधवार साधारण उपचारपछि बिहीबार काठमाडौँ थापाथली स्थित प्रसूति गृहमा उपचार र गर्भपतनका लागि पठाइएको प्रहरीले जनाएको छ।

पक्राउ परेका पुरुषलाई हाडनाता जबरजस्ती कसुरमा धादिङ अदालतबाट तीन दिनको म्याद थप गरी अनुसन्धान भईरहेको प्रहरीले जनाएको छ।