देवी प्रतिभाको भव्य बिदाई,भक्तजन भावविह्वल

पोखरा । पोखरामा जारी श्री गण्डकी शतकुण्डीय गायत्री कोटीहोम विराट ज्ञान महायज्ञमा जेठ १० देखि कथा वाचन गरिरहनुभएकी अन्तर्राष्ट्रिय कथा वाचिका देवी प्रतिभाको शुक्रबार साँझ भव्य बिदाई गरिएको छ ।

कोटहोमका संकल्पकर्ता बालयोगेश्वर श्रीविजय कृष्णमूर्तिजी महाराजले नेपाली काठमा हातले शिवको तस्बिर कुँदिएको मायाको चिनोसहित बिदाई गर्नुभएको हो ।

बिदाईमा महाराज, कोटीहोम आयोजक समितिका सहसंयोजक युवक लामिछानेलगायतले देवीलाई डालाका डाला पुष्पार्पण गरेका थिए ।उहाँको बिदाईमा हजारौँ भक्तजन भावविह्वल बनेका थिए ।

देवी प्रतिभाले भारतमा कैयौँ कार्यक्रम छाडेर, ४५ घण्टा भन्दा लामो यात्रा गरेर पोखरा आउनुभएको महाराजले बताउनुभयो । कोटीहोममा देवी प्रतिभाको यो सहभागिता दोस्रो हो ।

उहाँले यसअघि पनि १४ दिनसम्म प्रवचन दिनुभएको थियो ।

महाराजले नेपालको सात वटै प्रदेशमा कोटीहोम सञ्चालन गर्ने उद्घोष गर्नुभएको छ ।