प्रतिनिधि र प्रदेश सभा निर्वाचन : धादिङमा ६६ जनाबीच हुने भयो प्रतिस्पर्धा

अडियोमा सुन्नुहोस

धादिङ,२६ असोज ।
धादिङको २ निर्वाचन क्षेत्रमा ६६ जनाका बीचमा प्रतिस्पर्धा हुने निश्चित भएको छ। आगामी मंसिर ४ गते हुने प्रतिनिधि र प्रदेश सभा सदस्य पदका लागि २३ गते आइतबार ७४ जनाले उम्मेदवारी दर्ता गराएका थिए। त्यसमध्ये बुधबार ८ जनाले आफ्नो उम्मेदवारी फिर्ता लिएको निर्वाचन कार्यालय धादिङका जिल्ला निर्वाचन अधिकारी सन्तोष कुमार श्रेष्ठले बताउनुभयो ।

निर्वाचन कार्यालयका अनुसार उम्मेदवारी फिर्ता लिनेमा प्रतिनिधि सभा क्षेत्र नं १ मा स्वतन्त्र उम्मेदवारी दिएका राप्रपाका अजय कुमार रिमाल, प्रतिनिधि सभा क्षेत्र नं २ मा स्वतन्त्र उम्मेदवारी दिएका नेपाली काँग्रेसका रमेश धमला, नेपाल मजदुर किसान पार्टीका चक्र बहादुर शाह र राप्रपाका परशुराम तामाङ रहेका छन् ।

यस्तै क्षेत्र नं १ प्रदेश सभा ख मा स्वतन्त्र उम्मेदवार शालीग्राम अर्याल र ज्ञानेन्द्र प्रसाद सिलवाल, क्षेत्र नं २ को प्रदेश सभा ख मा उम्मेदवारी दिएका एमालेका धन बहादुर घले, क्षेत्र नं २ प्रदेश सभा क उम्मेदवारी दिएका राप्रपाका नारायण प्रसाद पोखरेलले उम्मेदवारी फिर्ता लिएका छन् ।