यस वर्षकै धेरै एकैदिन तीन सय ७९ स्थानमा डढेलो

धादिङ,०७ बैशाख।
बुधबार यस वर्षकै धेरै १७ जिल्लाका तीन सय ७९ स्थानमा डढेलो लागेको वन तथा भू–संरक्षण विभागले जनाएको छ ।

सुक्खा खडेरी बढ्दोक्रमसँगै पछिल्लो समय अधिकतम तापक्रममा वृद्धि भएर वन डढेलोका घटना पनि ह्वात्तै बढेका छन् । बढ्दो तापक्रम, प्रतिकूल मौसम, वनमा रहेको ज्वलनशील पदार्थको उपस्थिति तथा भौगोलिक विकटताका कारण वन डढेलो नियन्त्रण र व्यवस्थापन चुनौतीपूर्ण बन्दै गएको छ ।

वन डढेलोबाट निस्केको धुवाँका कारण देशभरको आकाश तुवाँलोले ढाकेको छ भने यसको वायु प्रदूषणले जनस्वास्थ्यमा समस्या देखिन थालेको छ । नेपालमा माघदेखि जेठसम्म बढी वनमा डढेलो लाग्ने गरेको छ ।

नेपालमा विशेष गरी तराई र भित्री मधेसका जिल्लामा वन डढेलो बढी लाग्ने गरेको विभागले जनाएको छ ।यस वर्ष हिउँदे वर्ष न्यून भएका कारण पनि वन डढेलो धेरै देखिएको विभागको भनाइ छ ।

वन डढेलो घटना मानवीय गतिविधिका कारण बढी हुने गरेको छ । स्थानीयले घाँसको मुना पलाउने आशमा जानाजानी आगो लगाउने गरेका छन् । डढेलो वन व्यवस्थापनको राम्रो औजार भए पनि त्यो नियन्त्रित हुनुपर्ने वन क्षेत्रको जानकारको भनाइ छ ।