सिद्धलेक ढेवाडाँडामा फागुन ३ गते शिवरात्री मेला लाग्दै,यी कलाकार आउने

धादिङ- सिद्धलेक गाउँपालिका स्थित सिद्धलेक (सिद्धबाबा मन्दिरमा) छैठौ सिद्धलेक शिवरात्री मेला-२०८२ हुने भएको छ ।

सिद्धलेक गाउँपालिकाको प्रायोजनमा फागुन ३ गते महाशिवरात्री पर्वको अवसर पारेर सिद्धलेक ढेवाडाँडा समाज नेपालले शिवरात्री मेला आयोजना गरेको सिद्धलेक ढेवाडाँडा समाजका सल्लाहाकार एव रेडक्रस नलाङ उपशाखाका सभापति अमृत गुरुङ (तिलक) ले बागमती कलमलाई जानकारी दिनुभयो ।

‘हाम्रो सिद्धलेक हाम्रो पहिचान,विकास र समृद्धीको लागि पर्यटन’ भन्ने मूल नारासहित आन्तरिक तथा वाह्य पर्यटन प्रवद्धन गर्ने उद्देश्यले विगत ६ बर्ष यता सिद्धलेकमा मेलालाई निरन्तरता दिईएको सल्लाहाकार गुरुङले बताउनुभयो ।

उक्त मेलामा राष्ट्रिय कलाकार चर्चित गायिका शान्ता रानी परियार, गायक राजु ढकाल, गायिका गिता सेन्चुरी, बिन्दा परियार, भावना अर्याल, गायक विवश दर्लामी मगर, प्रदिप बराईली, सम्वेदन थापा, मिलन विश्वकर्मा, मोडल टिका भुजेल, डान्सर प्रवेश श्रेष्ठ, विशाल भुजेल र डान्सर अप्सना गुरुङ (गृष्मा) लगाएतका स्थानीय कलाकारहरुको प्रस्तुति रहने सिद्धलेक ढेवाडाँडा समाजका अध्यक्ष दिल नारायण श्रेष्ठले बताउनुभयो।

यसैगरी मेला स्थल परिसरमा रक्तदान कार्यक्रम समेत हुने भएको छ ।

नेपाल रेडक्रस सोसाईटी नलाङ उपशाखाको आयोजना तथा रक्त सञ्चार सेवा केन्द्र धादिङको प्राविधिक सहयोगमा रक्तदान कार्यक्रम हुने नलाङ रेडक्रसका सभापति गुरुङले जानकारी दिनुभयो।

मेलामा सहभागी हुन आयोजकले सम्पूर्णलाई अपिल गरेको छ।

जिल्लाकै ऐतिहासिक धार्मिक तथा पर्यटन स्थल धादिङ्गको सिद्धलेक गाँउपालिकाभित्र पर्ने साविकको नलाङ्ग र सलाङ्ग (हाल वडा नं.२, ३ र ४) को सिमानामा अवस्थित सिद्धेश्वर महादेवको नामबाट नामाकरण भएको यस सिद्धलेक तथा ढेवाडाँडामा महादेवको पूजा अर्चना गर्न शिवरात्रीमा हरेक बर्ष श्रद्धालु भक्तजनहरूको ठूलो मेला लाग्ने गर्दछ।

सिद्धलेककै साथमा रहेको १ हजार ५२५ मिटर अग्लो ढेवाडाँडा रहेको छ। त्यहाँबाट धादिङ जिल्लाको सल्यानटार बाहेक साविकको ४९ वटा गाउँ विकास समितिहरु, बिभिन्न प्रख्यात हिमश्रृङ्खला, मनोरम हरियाली, जैविक विविधता र अन्य थुप्रै मनोरम दृष्यहरु देखिन्छन्।

सिद्धलेकलाई धार्मिक एवं पर्यटकीय दृष्टिकोणले जिल्लाकै अत्यन्तै महत्वपूर्ण स्थलको रूपमा लिइन्छ ।

पर्यटन प्रवद्धन हुन नसकेको यस स्थानमा सरोकारावालहरुले सामाजिक, सांस्कृतिक, धार्मिक र आर्थिक फाइदाका बारेमा व्यापक प्रचारप्रसार गर्न आवश्यक रहेको छ।

तस्विरमा सिद्धबाबा मन्दिर

१ हजार ५२५ मिटर उचाईमा रहेको ढेवाडाँडा