धादिङमा कृषकको उत्पादन बजारसम्म पुर्‍याउन ‘कृषि एम्बुलेन्स’ सेवा सुरु

धादिङ । कृषकले उत्पादन गरेका तरकारी, फलफूल, दूध तथा अन्य कृषि–पशुजन्य वस्तुको संकलन र बजारीकरणलाई सहज बनाउन धादिङको नीलकण्ठ नगरपालिका-८ स्थित आँकुरा कृषि तथा पशुपंक्षी सहकारी संस्था लिमिटेडले ‘कृषि एम्बुलेन्स’ सेवा सञ्चालनमा ल्याएको छ।

सहकारीले कृषकको उत्पादन समयमै संकलन गरी बजारसम्म पुर्‍याउने उद्देश्यसहित विशेष सवारी साधन सञ्चालनमा ल्याएको जनाएको छ।

कृषि एम्बुलेन्स खरिद तथा सञ्चालनका लागि करिब ३२ लाख रुपैयाँ खर्च गरिएको सहकारीका अध्यक्ष शम्भु श्रेष्ठले जानकारी दिनुभयो ।एउटा स्कुटर समेत खरिद गरिएको उहाँले बताउनुभयो ।

परियोजना साझेदार संस्थाहरू एक्सन नेपाल र हेफर इन्टरनेशनलबाट करिब ९ लाख रुपैयाँ सहयोग प्राप्त भएको र बाँकी रकम सहकारीले आफ्नै स्रोतबाट व्यवस्थापन गरेको अध्यक्ष श्रेष्ठले बताउनुभयो ।

कृषि एम्बुलेन्स सेवाले जिल्लाको कृषि तथा पशुपालन क्षेत्रलाई थप व्यवस्थित बनाउन सहयोग पुग्ने नीलकण्ठ नगरपालिका–८ का वडा अध्यक्ष तथा नगर प्रवक्ता प्रकाशकुमार श्रेष्ठले बताउनुभयो ।

किसानले उत्पादन गरेका वस्तुले पर्याप्त बजार नपाउँदा भोग्नुपरेका समस्यामा यस सेवाले केही हदसम्म समाधान ल्याउने उहाँको भनाई छ ।

सहकारीले हाल धादिङका विभिन्न क्षेत्रबाट कृषि तथा पशुजन्य उत्पादन संकलन गरी बिक्री वितरण गर्दै आएको छ।

जिल्लाबाहेक देशका प्रमुख सहरसम्म उत्पादन पुर्‍याउने काम भइरहेको र केही कृषि उत्पादन विदेश निर्यातको पहल समेत भइरहेको सहकारीले जनाएको छ।

भण्डारण व्यवस्थापनलाई थप प्रभावकारी बनाउन आगामी दिनमा चिस्यान केन्द्र (कोल्ड स्टोर) स्थापना गर्ने योजना समेत सहकारीले अघि सारेको छ।