डलर सटहीको बहानामा नगद र सुन ठगी गर्ने व्यक्ति धादिङबाट पक्राउ

धादिङ । धुनिवेशी नगरपालिका-९ झ्याप्लेखोलाबाट डलर साटिदिने भन्दै नगद र सुन ठगी गर्ने एक जना पक्राउ परेका छन्।

६५ हजार अमेरिकी डलर सटही गर्दा ठूलो फाइदा हुने भन्दै एक वृद्ध सुनचाँदी व्यवसायीलाई झुक्याएर ११ लाख ७५ हजार रुपैयाँ नगद तथा सुनका गहना ठगी गरेको आरोपमा एक जना पक्राउ परेका हुन्।

कास्कीको पोखरा महानगरपालिका–१७ बिरौटास्थित सुनचाँदी व्यवसायी ६९ वर्षीय थमान सिंह विश्वकर्मालाई योजनाबद्ध रूपमा ठगी गरिएको थियो।

अभियुक्तहरूले आफूहरूसँग ६५ हजार अमेरिकी डलर रहेको र सटही गर्दा ठूलो लाभ हुने भन्दै फोनमार्फत विश्वासमा पारी धादिङको धुनिवेशी नगरपालिका–८ चुलेडाँडास्थित एकान्त स्थानमा बोलाएका थिए।

गत जेठ १३ गते भएको उक्त घटनामा पीडित विश्वकर्माले साथमा ल्याएको ११ लाख ७५ हजार रुपैयाँ नगद, एक तोलाको सुनको बेरुवा औँठी र आधा तोलाको बक्स औँठी अभियुक्तहरूले लिएका थिए।

बदलामा उनीहरूले रुमालभित्र रहेको पोका देखाउँदै त्यसमा ६५ हजार अमेरिकी डलर रहेको बताएका थिए।

तर, अभियुक्तहरू त्यहाँबाट हिँडेपछि पीडितले पोका खोलेर हेर्दा डलरको सट्टा खाली कागजका टुक्राहरू मात्र भेटिएको जनाईएको छ ।

पीडितको उजुरीपछि जिल्ला प्रहरी कार्यालय धादिङले अनुसन्धान अघि बढाएको थियो।

अनुसन्धानका क्रममा घटनामा संलग्नमध्ये सिन्धुपाल्चोकको बाह्रबिसे नगरपालिका-३ धार्पा स्थायी घर भई हाल काठमाडौंको गोकर्णेश्वर नगरपालिका-३ शनिटार बस्दै आएका ३७ वर्षीय बुद्धि बहादुर योञ्जनलाई शुक्रबार पक्राउ गरिएको जिल्ला प्रहरी कार्यालय धादिङका सूचना अधिकारी प्रहरी नायव उपरीक्षक प्रकाश दाहालले जानकारी दिनुभयो ।

काठमाडौं उपत्यका अपराध अनुसन्धान कार्यालय टेकुको समन्वयमा उनलाई धादिङ–काठमाडौं सीमा क्षेत्रअन्तर्गत धुनिवेशी नगरपालिका-९ झ्याप्लेखोलाबाट मोटरसाइकलमा आउँदै गरेको अवस्थामा पक्राउ गरिएको हो।

प्रहरीले अभियुक्तको साथबाट बा-प्र-०२–०६७ प ६२६३ नम्बरको मोटरसाइकल र ठगीमा प्रयोग गरिएको रुमालभित्र राखिएका खाली कागजका बन्डल बरामद गरेको छ।

पक्राउ परेका योञ्जनविरुद्ध ठगी सम्बन्धी कसुरमा मुद्दा दर्ता गरी आईतबार धादिङ जिल्ला अदालतमा उपस्थित गराइएको थियो। अदालतबाट सात दिनको म्याद थप अनुमति प्राप्त भई घटनाबारे थप अनुसन्धान भइरहेको प्रहरीले जनाएको छ।

घटनामा संलग्न अन्य व्यक्तिहरूको खोजी कार्य जारी रहेको प्रहरी नायव उपरीक्षक प्रकाश दाहालले जानकारी दिनुभयो ।