धादिङमा ३ लाख ३४ हजार किलो युरिया मल मौज्दात,किन वितरण भएन मल ?

धादिङ । धादिङसहित आसपासका क्षेत्रमा रासायनिक मलको चरम अभाव रहेको चर्चा भइरहेका बेला गजुरीस्थित कृषि सामग्री कम्पनी लिमिटेडमा ३ लाख ३४ हजार ७५० किलोग्राम युरिया मल मौज्दात रहेको पाइएको छ।

कृषि सामग्री कम्पनी लिमिटेड, शाखा कार्यालय गजुरीले सार्वजनिक गरेको मौज्दात विवरणअनुसार युरिया मल ३ लाख ३४ हजार ७५० केजी, डीएपी मल १ लाख २४ हजार १०० केजी, पोटास मल २ हजार ९ सय केजी तथा कृषि चुन ५२ हजार ९ सय केजी मौज्दात रहेको छ।

कम्पनीका अनुसार आवश्यक प्रक्रिया पूरा गरी किसानलाई सहज रूपमा मल उपलब्ध गराउने तयारी भइरहेको छ।

असारमा धान रोपाइँ तीव्र भइरहेका बेला पर्याप्त मात्रामा युरिया मल मौज्दात रहेकाले किसानलाई राहत पुग्ने अपेक्षा गरिएको छ।

धादिङ क्षेत्र नम्बर २ का प्रतिनिधिसभा सदस्य बोधनारायण श्रेष्ठले जिल्लामा मल अभाव देखिनुको मुख्य कारण वितरण प्रणालीमा रहेको बताउनुभयो।

उहाँका अनुसार मल वितरणको जिम्मेवारी पाएका सहकारी तथा विक्रेताले बिक्री विवरण अनलाइन प्रणालीमा अनिवार्य रूपमा प्रविष्ट नगर्नु, कृषि सामग्री कम्पनीबाट समयमै मल नल्याउनु तथा स्थानीय तहबाट आवश्यक सहजीकरण नहुनुजस्ता कारणले अभाव भएको जस्तो देखिएको हो।

सांसद श्रेष्ठले जिल्लाको आवश्यकता अनुसार पुग्ने गरी मल उपलब्ध रहेको दाबी गर्दै वितरण व्यवस्थापनलाई प्रभावकारी बनाउन सम्बन्धित निकायले थप सक्रियता देखाउनुपर्ने बताउनुभयो।

उहाँले किसानहरू प्रायः युरिया मलको मात्र खोजी गर्ने र बालीका लागि आवश्यक अन्य प्रकारका मलको प्रयोग तथा माग कम हुने गरेको कारण पनि युरिया मलको अभाव बढी महसुस हुने गरेको उल्लेख गर्नुभयो।