त्रिशूली नदीमा बगेका टिपर चालकको सकुशल उद्धार

धादिङ । धादिङको गजुरी गाउँपालिका-५, बाङ्गेस्थित त्रिशूली नदीमा बगेका एक टिपर चालकको प्रहरीले सकुशल उद्धार गरेको छ।

जिल्ला प्रहरी कार्यालय धादिङका अनुसार आइतबार दिउँसो करिब २:१० बजे त्रिशूली नदीमा एक जना बगेको सूचना पछी इलाका प्रहरी कार्यालय गजुरीबाट प्रहरी टोली घटनास्थलमा खटिएको थियो।

प्रहरी टोलीले घटनास्थलबाट करिब ५०० मिटर तल महादेव खोल्सी नजिक त्रिशूली नदीको किनारबाट ती युवकको सकुशल उद्धार गरेको हो। उद्धारपछि उनलाई तत्काल उपचारका लागि प्राथमिक स्वास्थ्य केन्द्र, गजुरी पठाइएको प्रहरीले जनाएको छ।

उद्धार गरिएका व्यक्ति मकवानपुरको बकैया गाउँपालिका-१० स्थायी घर भई हाल ललितपुरको गोदावरी नगरपालिका-१०, चापागाउँ बस्दै आएका २३ वर्षीय भिम वाइवा रहेको खुलेको छ।

आरजे सप्लायर्स, गोदावरीबाट बालुवा लिन आएका टिपर चालक हुन्।

प्रहरीका अनुसार वाइवाको स्वास्थ्य अवस्था मध्यम रहेको छ। उनी सामान्य रूपमा बोल्न सक्ने अवस्थामा रहेका छन् र प्राथमिक स्वास्थ्य केन्द्र गजुरीमा उपचार भइरहेको छ।