बाढीका कारण अवरुद्ध बनेको पृथ्वी राजमार्ग सूचारु

धादिङ। भोटेकोशी नदीमा आएको आकस्मिक बाढीका कारण अवरुद्ध बनेको देशकै लाइफलाइन मानिने पृथ्वी राजमार्ग सूचारु भएको छ ।

पृथ्वी राजमार्ग अन्तर्गत धादिङ खण्डको विभिन्न ठाउँमा रहेको लेदो हटाएपछि चार दिन पछि एकतर्फी सञ्चालनमा ल्याइएको हो ।

राजमार्ग सञ्चालन भएसँगै होल्ड भएका सवारी साधनहरुलाई पठाइएको जिल्ला प्रहरी कार्यालय धादिङका प्रहरी नायव उपरीक्षक प्रकाश दाहाले बताउनुभयो ।

धादिङको गजुरी गाउँपालिका-५ गलौदीमा आंशिक रुपमा लेदो पन्छाएर गजुरी आसपास रहेका सवारीहरुलाई गलौदी क्रस गरिएको छ भने बैरेनी महेश दोभान, बांगे, जरेखेत, गलौदी क्षेत्रमा टन्नै लेदो जमेको छ ।

हटाउने कार्य भइरहेको छ । पृथ्वी राजमार्ग पूर्ण रुपमा खुलेको छैन।

धादिङका प्रमुख जिल्ला अधिकारी लक्ष्मी पाण्डेय (गौतम) ले पनि पृथ्वी राजमार्ग आंशिक रुपमाम मात्रै सञ्चालन भएको बताउनुभयो ।

अति आवश्यक काम बाहेक राजमार्गको यात्रा नगर्न र सूचना लिएर मात्रै यात्रा गर्न उहाँले आग्रह गर्नुभयो।