धादिङ मुस्लिम समुदायद्वारा बाढीपीडितलाई सहयोगको लागि १ लाख ३४ हजार संकलन

धादिङ। धादिङ मुस्लिम समुदायले भोटेकोशी-त्रिशूली नदीमा आएको विनाशकारी बाढी प्रभावित नागरिकको राहत र पुनःस्थापनाका लागि १ लाख ३४ हजार २०९ रुपैयाँ संकलन गरेको छ।

धादिङ मुस्लिम समुदाय, धादिङबेंसी तथा मदरसा हनिफिया रजवियाको पहलमा धादिङबेंसी बजार क्षेत्रमा सञ्चालन गरिएको सहयोग संकलन अभियानबाट उक्त रकम जुटाइएको हो।

रसुवा, नुवाकोट, धादिङलगायत जिल्लामा बाढी र पहिरोका कारण ठूलो जनधनको क्षति भएपछि विपद्मा परेका नागरिकको पीडामा साथ दिने उद्देश्यले अभियान सञ्चालन गरिएको समुदायले जनाएको छ।

अभियानमा मुस्लिम समुदायका सदस्यसँगै स्थानीय व्यवसायी तथा शुभेच्छुकहरूले स्वेच्छिक रूपमा आर्थिक सहयोग गरेका थिए।

संकलित रकम प्रधानमन्त्री दैवी प्रकोप उद्धार कोषमा जम्मा गरिएको छ।

समुदायका अनुसार रकम राष्ट्रिय वाणिज्य बैंकमा रहेको कोषको आधिकारिक खातामा भौचर तथा चेकमार्फत दाखिला गरिएको हो।

विपद्को समयमा सहयोग अभियानमा साथ दिने सम्पूर्ण दाताहरू, मुस्लिम समुदायका सदस्य, स्थानीय व्यवसायी, शुभेच्छुक तथा सञ्चारकर्मीलाई धादिङ मुस्लिम समुदायले धन्यवाद व्यक्त गरेको छ।

समुदायले विपद्मा परेका नागरिकको दुःखमा साथ दिनु सबैको साझा दायित्व भएकाले आगामी दिनमा पनि आवश्यकताअनुसार मानवीय सहयोग र सहकार्यलाई निरन्तरता दिने जनाएको छ।