सिद्धलेक-गजुरी जोड्ने झोलुङ्गे पुलमा मोटरसाइकल सञ्चालनमा रोक,मोटरसाइकललाई विकल्प कुन झोलुङ्गे पुल ?

धादिङ। विनाशकारी बाढीका कारण धादिङका सडक तथा पुलहरूमा क्षति पुगेपछि सदरमुकाम धादिङबेँसी र पृथ्वी राजमार्गबीचको आवतजावत प्रभावित भएको छ।

यसैक्रममा सिद्धलेक गाउँपालिका-६ खरमटार र गजुरी गाउँपालिका-२ बिहानी पम्प नजिक जोड्ने झोलुङ्गे पुलमा मोटरसाइकल आवतजावतमा रोक लगाइएको छ।

भदौ १० गते रसुवा हुँदै त्रिशूली नदीमा आएको विनाशकारी बाढीले पुलको दायाँ-बायाँ भागमा रहेको पखेटा अर्थात् ‘स्टेबिलाइजिङ केबल’ (विन्ड गाई) मा क्षति पुर्‍याएको छ।

पुललाई सन्तुलित राख्न, हावा तथा मानिसको आवतजावतका कारण हुने हल्लाइ कम गर्न र पुलमा पर्ने भारलाई दुवैतर्फ बाँडफाँड गर्न महत्वपूर्ण भूमिका खेल्ने उक्त संरचनामा क्षति पुगेपछि पुल जोखिमपूर्ण बनेको हो।

पुलमा एकैपटक धेरै मोटरसाइकल आवतजावत गर्दा पुल अत्यधिक कोल्टिने गरेको पाइएपछि आजदेखि मोटरसाइकल आवतजावतमा रोक लगाइएको सिद्धलेक गाउँपालिका-६ का वडाध्यक्ष सुरेन्द्र मगरले जानकारी दिनुभयो ।

‘बाढीले पुलको दायाँ-बायाँको संरचनामा क्षति पुगेको र एकैपटक धेरै मोटरसाइकल आवतजावत गर्दा पुल धेरै कोल्टिने भएकाले कुनै मानवीय क्षति नहोस् भनेर मोटरसाइकल चलाउन रोक लगाएका हौँ,’ वडाध्यक्ष मगरले भन्नुभयो। उहाँका अनुसार हाल पुलबाट पैदल यात्रु भने आवतजावत गर्न सक्नेछन्।

बाढीले गजुरी गाउँपालिका-२ र सिद्धलेक गाउँपालिका-६ जोड्ने फुर्केखोलाको पक्की पुल बगाएपछि धादिङबेँसीतर्फ आवतजावत गर्ने मुख्य सडकको सम्पर्क टुटेको छ।

पक्की पुल बगेपछि धादिङबेँसीबाट परेवाटार, पिपलटार हुँदै केउरेनी-मासटार सडकबाट सिद्धलेक-६ को खरमटार पुग्ने र त्यहाँबाट झोलुङ्गे पुल तरेर गजुरी-२ को बिहानी पम्पतर्फ निस्कने मार्ग वैकल्पिक रूपमा प्रयोग हुँदै आएको थियो। यही कारण झोलुङ्गे पुलमा मोटरसाइकल तथा पैदल यात्रुको चाप बढेको थियो।

वैकल्पिक सडक पनि जोखिमपूर्ण

धादिङबेँसीबाट परेवाटार, पिपलटार हुँदै मासटार जोड्ने वैकल्पिक सडक सञ्चालनमा आए पनि ठूला सवारीसाधनका लागि सहज छैन।

हाइस तथा साना विद्युतीय सवारीसाधन सञ्चालन भए पनि कतिपय स्थानमा सडक साँघुरो तथा जोखिमपूर्ण भएकाले आवतजावतमा कठिनाइ भइरहेको छ।

यसले गर्दा धादिङबेँसीबाट काठमाडौं जाने यात्रुहरूले समेत वैकल्पिक बाटो प्रयोग गर्नुपर्ने अवस्था छ।

हाल धादिङबेँसीबाट हाइसमा सिद्धलेक-६ को खरमटार पुग्ने, त्यहाँबाट झोलुङ्गे पुल तरेर गजुरी-२ को बिहानी पम्प नजिक पुग्ने र त्यहाँबाट काठमाडौं जाने सवारीसाधन चढ्ने अवस्था रहेको छ।

मोटरसाइकलका लागि भने मलेखु खोलाको झोलुङ्गे पुल अर्को विकल्पका रूपमा प्रयोग गर्न सकिने भएको छ। जुन फिसफिसटार भन्दा अघिको घुम्तीबाट तल्लो सडक हुँदै मलेखु खोलाको झोलुङ्गे पुलसम्म पुग्न सकिने र राजमार्ग निस्कन मिल्ने वडाध्यक्ष मगरले बताउनुभयो । उक्त पुलमा बाढीले क्षति नगरेकाले मोटरसाइकल सहज रुपमा आवतजावत गर्न मिल्ने गरी व्यवस्था गरिएको उहाँको भनाई छ।

पक्की पुलहरू पुनः सञ्चालनमा नआएसम्म वैकल्पिक सडक तथा झोलुङ्गे पुलमाथिको निर्भरता बढ्ने भएकाले जोखिमयुक्त संरचनामा थप क्षति हुन नदिन सावधानी अपनाउनुपर्ने अवस्था देखिएको छ।