फोकस नेपाल र अक्सफामद्वारा गजुरीका बाढी प्रभावित परिवारलाई खाद्यान्नसँगै सरसफाइ सामग्री सहयोग

धादिङ । बाढीबाट प्रभावित गजुरी गाउँपालिकाका २१६ परिवारलाई फोकस नेपाल र अक्सफामको सहकार्यमा आपत्कालीन राहत सामग्री वितरण गरिएको छ।

गजुरी गाउँपालिकाको त्रिशूली नदी आसपासका चालिसे, कालिकास्थान, बाङ्गे, गलौंदी, पोखरेखोला र जहरे बस्तीका परिवारलाई खाद्य सामग्रीसँगै सरसफाइ, स्वच्छता तथा अस्थायी आश्रयका सामग्री उपलब्ध गराइएको हो।

राहत सामग्रीमा चामल, दाल, खानेतेल, नुन, चिनी, सोयाबिनलगायत खाद्य सामग्री छन्। त्यस्तै पानीका बाल्टिन, पानी शुद्धीकरण सामग्री, साबुन, तौलिया, सेनिटरी प्याड, त्रिपाल र प्लास्टिक डोरीलगायत सामग्रीसमेत वितरण गरिएको छ।

स्थानीय सरकारसँग समन्वय गरी प्रभावित परिवारको तत्कालीन आवश्यकता पहिचान गरेर राहत वितरण गरिएको फोकस नेपालका परियोजना संयोजक प्रकाशचन्द्र न्यौपानेले बताउनुभयो। विपद्पछि खाद्य तथा गैरखाद्य सामग्रीको अभाव झेलिरहेका परिवारलाई तत्काल आवश्यक सहयोग पुर्‍याउने उद्देश्यले राहत कार्यक्रम सञ्चालन गरिएको उहाँको भनाइ छ।

फोकस नेपालले अक्सफामको सहयोगमा यसअघि पनि धादिङका विभिन्न बाढी प्रभावित क्षेत्रमा राहत वितरण गरिसकेको छ। गल्छी गाउँपालिका-६ का ८० प्रभावित तथा जोखिममा रहेका परिवारलाई खाद्य, खानेपानी, सरसफाइ तथा आश्रयसम्बन्धी आपत्कालीन सामग्री उपलब्ध गराइएको थियो।

त्यसैगरी गल्छी गाउँपालिका-४ स्थित धादिङ बहुमुखी क्याम्पसमा अस्थायी रूपमा आश्रय लिइरहेका ७६ बाढी प्रभावित परिवारलाई पनि राहत सामग्री वितरण गरिएको फोकस नेपालले जनाएको छ।

फोकस नेपालका कार्यकारी निर्देशक एकराज छत्कुलीका अनुसार विपद्पछिको अवस्थाको निरन्तर अनुगमन भइरहेको छ। स्थानीय तहसँगको समन्वयमा प्रभावित समुदायको आवश्यकता पहिचान गर्दै आगामी दिनमा पनि आवश्यकताका आधारमा मानवीय सहयोगलाई निरन्तरता दिइने उहाँले जानकारी दिनुभयो।