प्रदेश र प्रतिनिधिसभातर्फ समानुपातिकबाट निर्वाचित सांसदलाई प्रमाणपत्र वितरण

निर्वाचन आयोगले प्रतिनिधिसभा सदस्य तथा प्रदेश सभा सदस्य निर्वाचनअन्तर्गत आइतबार समानुपातिक निर्वाचन प्रणालीतर्फका निर्वाचित सांसदहरूलाई प्रमाणपत्र वितरण गरेको छ ।

आयोगको कान्तिपथस्थित परिसरमा आयोजित समारोहमा मुख्य निर्वाचन अधिकृत एवं आयोगका सचिव गोकर्णमणि दुवाडीले प्रतिनिधिसभा र सातै प्रदेशका प्रदेश सभामा विभिन्न राजनीतिक दलका तर्फबाट निर्वाचित सदस्यलाई प्रमाणपत्र वितरण गरेका हुन् ।

प्रमुख निर्वाचन आयुक्त दिनेशकुमार थपलियाले निर्वाचित सांसदहरूलाई खादा लगाएर बधाई ज्ञापन गरे । समारोहमा सचिव दुवाडीले निर्वाचित सांसदहरूलाई बधाई दिँदै निर्वाचन सम्पन्न गराउन भूमिका निर्वाह गर्ने सम्बन्धित सबैमा धन्यवाद व्यक्त गरे ।

आयोगले गत २८ मंसिरमा समानुपातिक निर्वाचन प्रणालीतर्फको परिणाम सार्वजनिक गरेको थियो । समानुपातिक निर्वाचन प्रणालीबाट एक सय १० सांसद निर्वाचित भएका थिए ।