धादिङमा आजदेखी क्रिकेट प्रतियोगिता सुरु हुदै,उद्घाटन खेलमा गजुरी र खनियाबास भिड्ने

अडियोमा सुन्नुहोस

धादिङ,०१ कात्तिक।
धादिङमा आजदेखी जिल्ला स्तरीय अन्तरपालिका टी–२० क्रिकेट प्रतियोगिता सुरु हुदैछ ।

धादिङ जिल्ला क्रिकेट संघको आयोजनामा हुने प्रतियोगिताको उद्घाटनको पहिलो खेलमा गजुरी र खनियाबासबिच प्रतिस्पर्धा हुनेछ । जिल्लाको बेनिघाट रोराङ गाउँपालिकाको विशालटार स्थित चन्द्रोदय मा.विको खेल मैदानमा बिहान ९ बजे उद्घाटन समारोह हुने र खेल भने बिहान ११ बजे सुरु हुने संघका अध्यक्ष दिपेश कँडेलले बताउनुभयो ।

प्रतियोगिताको उद्घाटन बागमती प्रदेशका मुख्यमन्त्री राजेन्द्र पाण्डेले गर्ने आयोजकले जनाएको छ । यस्तै आजको दोस्रो खेल धुनीबेसी र त्रिपुरासुन्दरी बिच खेल हुने कँडेलले बताउनुभयो ।

प्रतियोगितामा जिल्लाभरका आठ ओटा पालिकाका सहभागी भएका छन् । प्रतियोगिताको खेल तालिका अनुसार चार÷चार टिमको दुई समुह बिभाजन गरिएको छ । जसअनुसार समुह ए मा खनियाबास, त्रिपुरासुन्दरी, धुनीबेसी र गजुरी रहेको छ भने समुह बी मा सिद्धलेक, बेनीघाट रोराङ, गल्छी र नीलकण्ठ नगरपालिका रहेको छ ।

धादिङमा जिल्ला स्तरय क्रिकेट प्रतियोगिता आयोजना गरिएको यो तेश्रो पटक हो ।पछिल्लो समय जिल्लामा गाउँपालिका स्तरीय क्रिकेट प्रतियोगीता हुन थालेका छन् भने विद्यालयमा हुने बार्षिक खेलकुदमा पनि क्रिकेट खेललाइ समावेश गरिन थालिएको छ ।