धादिङमा बैशाख १२ देखि प्रदेश स्तरीय खेलकुदको लागि खेलाडी छनोट गरिदै

धादिङ,११ बैशाख ।
दोस्रो बागमती प्रदेश खेलकुद प्रतियोगिताका लागि बैशाख १२ गतेदेखि धादिङ जिल्लास्तरीय खेलाडी छनौट गरिने भएको छ ।

आईतबार धादिङ जिल्ला खेलकुद विकास समितिले एक सूचना जारी गर्दै प्रदेश स्तरीय खेलकुदको लागि बैशाख १२ गतेदेखि १५ गतेसम्म जिल्लास्तरीय खेलाडी छनौट प्रतियोगिता गर्ने जनाएको छ ।

बागमती प्रदेश खेलकुद विकास परिषदको आयोजनामा बैशाखको अन्तिम साता हेटौंडामा हुने बागमती प्रदेश खेलकुद प्रतियोगिताका लागि धादिङबेशीमा महिला/पुरुष दुबैतर्फ बिभिन्न ९ बिधामा धादिङ जिल्लास्तरीय खेलाडी छनोट गरिने धादिङ जिल्ला खेलकुद विकास समितिका अध्यक्ष प्रताप सिं तामाङले जानकारी दिनुभयो ।

तामाङका अनुसार भलिबल, तेक्वान्दो, एथ्लेटिक्स, कँराते, आईटिएफ तेक्वान्दो, ब्याडमिन्टन, बक्सिङ, क्रिकेट र फुटबल रहेको छ । बैशाख १२ गते व्याडमिन्टन,१३ गते एथ्लेटिक्स, १४ गते कँराते, आईटिएफ तेक्वान्दो, क्रिकेट र बक्सिङ खेलको छनौट प्रतियोगिता हुने छ भने भलिबल र फुटबलको छनौट प्रतियोगिता भने बैशाख १५ गते हुने अध्यक्ष तामाङले बताउनुभयो ।

जिल्ला खेलकुद विकास समितिले प्रत्येक खेलको लागि सम्पर्क व्यक्ति समेत तोकेको छ ।यसअघि बागमती प्रदेश खेलकुद विकास परिषद्ले गत चैतमा नै जिल्ला छनौट गरी खेलाडीको नामावली पठाउन पत्राचार गरेको थियो । त्यहीअनुसार बागमती प्रदेशका जिल्लाहरु जिल्ला छनौटमा जुटेका थिए ।

धादिङमा पनि चैत्र २५ गतेदेखी धादिङ जिल्लास्तरीय खेलाडी छनौटको मिति तय भएको थियो । तर परिषद्ले छनोट नगर्न आव्हान गरेसँगै जिल्लामा खेलाडी छनोट कार्यक्रम स्थगित भएको थियो ।

परिषद्ले पछी फेरी खेलाडी छनौट गर्न पत्राचार गरेसँगै जिल्लामा १२ गतेदेखी खेलाडी छनोट प्रतियोगिता गर्न लागिएको हो।