“म बा बन्छु नि ल”

मलाई म बा बनिसके पछि
बा का पिडा बुझेर के अर्थ
मलाई त म बा बन्नु अघि नै
बा बनेर हेर्नू छ
त्यसैले बा
एकदिन कै लागि भए पनि
म बा र तिमी छोरा बन ल!

बा
तिमी मेरो काधमा घण्टौ सम्म चड्दा
म बोक्न सक्ने रहेछु कि नाई
खल्ती रित्तो भएकै दिन
मलाई यो चाहियो उ चाहियो भन्दै
तिमी खानै नखाइदिनु
म फकाउन सक्ने रहेछु कि नाइ?
म

तिम्रो कमाइको दोब्बर
मेरो कलेज शुल्क हुँदा तिमीले कसरी दियौ?
तिमी भन्नु यहाँ चाहिन्छ, त्यहाँ चाहिन्छ
म पुर्याउन सक्ने रहेछु कि नाइ?

मलाई सुन्नु छ
फलानाको छोरो त काम नलाग्ने भयो
बिग्रेछ क्यारे
मेरो कानमा त्यो सामर्थ्य रहेछ कि नाई?

सियोले सिलाएको पुरानो कोट
च्यातिसकेको टोपी
हिड्दा हिड्दा चुडिसकेका चप्पल
चिसो सितले फाटेका खुट्टा
मेरो छोरोले एकदिन त राम्रो गर्नेछ
आत्म बिश्वास राख्दैशिर ठाडो पार्दै
हिड्न सक्ने रहेछु कि नाई?

छोरोको कै लागी तिम्रो जीवन साथीले
तीजको दिन पनि
सारी को सट्टा पुरानै धोतीले टारेको
र खाली श्रोत्रम् देख्न सक्ने रहेछु कि नाइ?

लेखु त के लेखु
तिमी अलिखित महाकाब्य हौ
दृढताको सागर हौ, धैर्यताको ब्रह्माण्ड हौ
हौसलाको आकाश हौ
र प्रेरणाको ज्योति हौ।

बा एउटा कुरा भनौ
मलाई त तिमी सगै सुत्दा सुत्दा
तिम्रो दिनभरको पसिनाको गन्ध
बास्ना आउन थालिसकेको थियो।
म शहर पसेको केहि महिना सम्म
त्यो बास्ना खोजिरहे।

आजसम्म मैले खै किन किन
तिमीलाई अङालो हाल्न सकेको छैन
तिमी मेरो छोरा बनेर
मलाई अङालो हालिदिनु ल
त्यसैले बा
एकदिन कै लागि भए पनि
म बा र तिमी छोरा बन ल!!

लेखकः– द्रुपद अधिकारी ,धादिङ फुलखर्क