असार १ देखी भदौं मसान्तसम्म सडक खन्न प्रतिबन्ध

सडक विभागअन्तर्गतको संघीय सडक सुपरिवेक्षण तथा अनुगमन कार्यालयले असार १ देखी भदौं मसान्तसम्म सडक खन्न प्रतिबन्ध गरेको छ।

कार्यालयले एक सूचना जारी गर्दै वर्षायामको समयमा सडक खन्न जबर्जस्ती गरेमा कारबाही गर्ने जनाएको छ ।जारी सुचना अनुसार आगामी असर १ देखि भदौ मसान्तसम्म सडकमा खन्न पाइने छैन ।

‘वर्षायाममा धारा, ढल, बिजुली, टेलिफोन आदि प्रयोजनका लागि सडक खन्दा तत्काल मर्मत–सम्भार गरी यथास्थितिमा ल्याउन नसकिने र सडक पनि थप बिग्रँदै जाने भएकोले यही असार १ गतेदेखि भाद्र मसान्तसम्म यस कार्यालय अन्तर्गतका सडक डिभिजनहरू मातहत रहेका कुनै पनि सडक खन्ने स्वीकृति नदिइने,’ जारी सुचनामा भनिएको छ।

कसैले जबर्जस्ती सडक खनेको पाइएमा सार्वजनिक सडक ऐन २०३१ अनुसार कडा कारबाही गरिने जनाएको छ ।