कोरोनाको नयाँ लहर फैलिदै : धादिङमा पनि उच्च जोखिम भएको भन्दै सतर्कता अपनाउन आग्रह

धादिङ । केही दिनदेखि कोरोना संक्रमण तिब्र रुपमा फैलिरहेकाले उच्च सतर्कता अपनाउन धादिङ कोभिड व्यवस्थान समितिले आग्रह गरेको छ । आईतबार बसेको जिल्ला कोभिड व्यवस्थान समितिको बैठकले नयाँ लहरको कोभिड संक्रमणको जोखिमलाई मध्यनजर गर्दै सतर्कता अपनाउन नागरिकहरुलाई आग्रह गरेकोे हो ।

छिमेकी देशहरुमा कोभिड–१९ संक्रमण दर तिव्र रुपमा बढिरहेकाले नेपाल सहित धादिङमा पनि संक्रमणको जोखीम उच्च भएको भन्दै सतर्कता अपनाउन आग्रह गरेको हो । गृह मन्त्रालय र स्वास्थ्य तथा जनसंख्या मन्त्रालयले मातहतका निकायहरुलाई सतर्कता अपनाउन निर्देशन दिएकोले धादिङमा जारी महोत्सवमा अनिवार्य मास्क लगाई सुरक्षाका सम्पूर्ण मापदण्ड अपनाउन समेत आग्रह गरेको छ ।

बैठकले सार्वजनिक तथा सबै यातायतका साधनहरुले सिट क्षमता भन्दा बढि यात्रु नराखी अनिवार्य रुपमा स्वास्थ्य सुरक्षाका उपायहरु अवलम्बन गर्न लगाउने, सबै स्थानिय तहका स्वास्थ्य संस्थाहरुबाट एन्टिजेन परिक्षणको व्यवस्था मिलाउन अनुरोध गर्ने, आईशोलेसन वार्ड भवनको लागि सघन शहरी विकास तथा भवन निर्माण तथा नीलकण्ठ नगरपालिकालाई अनुरोध गर्नेअस्पतालमा थप १५ वटा एचडियू, ५० ओटा आईशोलेसन बेड सञ्चालन गर्न स्थानिय तहलाई अनुरोध गर्ने लगायतका निर्णयहरु गरेको छ । यस्तै धादिङ अस्पतालले कोरोना संक्रमित आए उपचारको पुरै तयारीमा रहेको जनाएको छ ।अस्पतालले ४५ बेड अक्सिजन सहित तयारी अवस्थामा राखिएको जनाएको छ।

नेपाल सरकार स्वास्थ्य तथा जनसङ्ख्या मन्त्रालयले पनि सार्वजनिक स्थलमा अनिवार्य मास्क लगाउन अनुरोध गरेको छ । मन्त्रालयले एक विज्ञप्ति प्रकाशित गरी छिमेकी देशमा कोरोना भाइरसको नयाँ भेरियन्ट बिएफ–७ को सङ्क्रमण बढ्दै गएको भन्दै मास्क लगाउन आग्रह गरेको हो ।

यसैगरी मन्त्रालयले भौतिक दूरीसमेत कायम गर्न पनि आग्रह गरेको छ । स्वास्थ्य मन्त्रालयका प्रवक्ता तथा डा सञ्जयकुमार ठाकुरद्वारा हस्ताक्षरित उक्त विज्ञप्तिमा स्यानिटाइजरको प्रयोग गर्न, नियमितरूपमा साबुनपानीले हात धुनेलगायत स्वास्थ्यका सबै मापदण्ड अनिवार्य पालना गर्न आग्रह गरिएको छ । यसैगरी कोभिड–१९ को बुस्टर डोज खोप लगाउन पनि अपिल गरिएको छ ।

अङ्ग्रेजी नयाँ वर्ष २०२३, क्रिसमसलगायत कुनै पनि भिडभाड हुने स्थलमा विशेष सतर्कता अपाउनसमेत मन्त्रालयले आग्रह गरेको छ । नेपालमा बिएफ–७ भेरियन्ट पुष्टि नभए पनि चीन र भारतमा बढ्दै गएकाले खुला सिमाना र आवतजावतका कारण जोखिम रहेको विज्ञप्तिमा उल्लेख छ ।