धादिङका विभिन्न पालिकामा मोतिबिन्दु छनौट तथा निशुल्क आँखा जाँच शिविर संचालन

धादिङ,२६ फागुन ।
धादिङका विभिन्न स्थानिय तहमा मोतिबिन्दु छनौट एकदिने निशुल्क आँखा जाँच शिविर संचालन भइरहेको छ ।

तिलगंगा आँखा प्रतिष्ठान, काठमाडौँ र जिल्ला सामुदायिक आँखा केन्द्र धादिङको संयुक्त आयोजना र स्थानिय निकायहरुको समन्वयमा शिविर संचाल भएको जिल्ला सामुदायिक आँखा केन्द्र धादिङका प्रमुख रामसिँह तामाङले जानकारी दिनुभयो ।

शिविर कार्यक्रम अन्तर्गत बिहीबार गंगाजमुना गाउँपालिका वडा नं २ स्थित तावल सामुदायिक स्वास्थ्य ईकाई १७५ जनाको आँखा परिक्षण गरिएको छ । जस्मा १५ जनामा मोतिबिन्दु देखिएको छ भने १४ जनालाई चस्मा वितरण गरिएको तामाङले बताउनुभयो ।

त्यस्तै गत शनिबार नीलकण्ठ नगरपालिका वडा नं ५ स्थित खाल्टे स्वास्थ्य चौकीमा भएको शिविरमा ११४ जनाको आँखा परिक्षण गरिएको थियो भने परिक्षण गरिएको मध्ये ११ जनामा मोतिबिन्दु देखिएको र ८ जनालार्ई चस्मा वितरण गरिएको तामाङले बताउनुभयो ।

तामाङका अनुसार भोलि फागुन २७ गते नीलकण्ठ नगरपालिका वडा नं ६ स्थित सुनौलोबजार स्वास्थ्य चौकी र चैत १ गते बुधबार नीलकण्ठ १० स्थित भारमाले ज्यामरुङमा शिविर संचालन हुने छ ।

साथै आँखा जाँच कार्यक्रममा छनौट गरिएका र सामुदायिक आँखा केन्द्र धादिङमा जाँच गराई अप्रेसनका लागि नाम टिपाएका मोतिबिन्दुका बिरामीहरुलाई जिल्ला सामुदायिक आँखा केन्द्र धादिङमा चैत ३ र ४ गते न्युनत्तम शुल्कमा अप्रेसन गरिने तामाङले बताउनुभयो ।