हिमाल साकोसको स्थापना दिवसमा धादिङबेशीमा ५३ जनाद्धारा रक्तदान

धादिङ,२९ फागुन ।
हिमाल बचत तथा ऋण सहकारी संस्थाको २३ औँ संस्था स्थापना दिवसको अवसरमा धादिङबेशीमा रक्तदान कार्यक्रम सम्पन्न भएको छ।

सोमबार सहकारीको आयोजना तथा नेपाल रेडक्रस सोसाईटी रक्त संचार केन्द्र धादिङको प्राविधिक सहयोगमा धादिङ अस्पताल परिसरमा भएको रक्तदान कार्यक्रममा १५ महिला र ३८ पुरुष गरी ५३ जनाले रक्तदान गरेका छन् ।

यस्तै स्थापना दिवसकै अवसरमा एम्बुलेन्स अंकलका रुपमा परिचित धादिङबेसी बीचबजारका नारायण कुमार श्रेष्ठले ५६ औं पटक रक्तदान गर्नुभएको छ। श्रेष्ठले तीन–तीन महिनामा रक्तदान गर्दै आउनुभएको छ।

उहाँले कम्तीमा ७५ पटक रगत दिने रहर रहेको बताउनुभएको छ ।नेपाल रेडक्रम सोसाइटी धादिङ शाखाका कोषाध्यक्ष समेत रहेका श्रेष्ठ हरेक दुर्घटनामा पुग्ने र उद्दार तथा प्राथमिक उपचारका साथै परामर्श दिने गर्नुहुन्छ।

पछिल्लो समय धादिङमा रक्तदान गर्नेको संख्या बढ्दै गएको छ । नियमित रूपमा रक्तदान गर्ने रक्तदाताहरूको संख्या बढेसँगै जिल्लामा रगत संकलन बढ्दै गएको कोषाध्यक्ष श्रेष्ठले बताउनुभयो ।

धादिङमा अभियानकै रुपमा रक्तदान कार्यक्रम आयोजना गरिदै आएको छ । रगतको अभावलाई न्युनीकरण गर्नको लागी विभिन्न मेला, पर्व, उत्सव, सहकारीको बार्षिक साधारण सभा लगायतको भेला हुने कार्यक्रममा रक्तदान कार्यक्रम राखि रगत संकलन गरीदैँ आएको छ ।