धादिङको नीलकण्ठ,सिद्धलेक र थाक्रेका विद्यालय पनि बन्द

धादिङ,२८ जेठ।
गर्मी बढेपछि धादिङमा पनि धमाधम बिद्यालय बन्द भएका छन् ।

जिल्लाका बिभिन्न स्थानिय तह हरुले सूचना जारी गर्दै आफ्ना पालिका भित्रका बिद्यालय बन्द गर्न अनुरोध गरेको छ । आईतबार नीलकण्ठ नगरपालिकाले एक सूचना जारी गरेर अत्याधिक गर्मीका कारण वालवालिकाको विद्यालयको कक्षा कोठामा हुने सिकाई क्रियाकलपमा अवरोध सृजना भएको सरोकारवालाहरुबाट गुनासो आएपछि नगरपालिका मातहतका विद्यालय ४ दिन बन्द गर्ने निर्णय गरेको छ ।नगरपालिकाले आजदेखी ३२ गतेसम्म बिद्यालय बन्द गर्न अनुरोध गरेको छ ।

त्यसैगरी सिद्धलेक गाउँपालिकाले पनि अत्याधिक बढेको गर्मीबाट विद्यालयमा पठनपाठन गराउन समस्या हुनुका साथै विद्यार्थीहरुको स्वास्थ्यमा समस्या देखिन थालेको भन्दै वर्षे बिदाबाट कट्टा हुने गरी आजदेखी ३२ गतेसम्म बिद्यालय बन्द गर्न अनुरोध गरेको छ ।

साथै गाउँपालिकाले बालबालिकालाई दिउँसोमा घर बाहिर निस्कन नदिन,रचनात्मक र सिर्जनात्मक कार्यमा सहभागी हुन प्रोत्साहन गर्न, पोषणयुक्त खाना खुवाउन ,जंकफुड तथा स्वास्थ्यलाई असर गर्ने खाना कुरा खान नदिन र स्वच्छ पानि पिउने व्यवस्था मिलाउन अनुरोध गरेको छ ।

यता थाक्रे गाउँपालिकाले पनि आजैदेखी असार १ गतेसम्म बिद्यालय बन्द गर्न सूचना जारी गरेको छ ।गाउँपालिकाको निर्णय अनुसार वर्षे बिदाबाट कट्टा हुने गरी अध्यापन नगर्न र नगराउन आग्रह गरेको छ ।

गाउँपालिकाले सम्पूर्ण शिक्षक,बिद्यार्थी र अभिभावकलाई गर्मी एवम लु बाट बच्न साबधानी अपनाउन अनुरोध गरेको छ। त्रिपुरासुन्दरी गाउँपालिकाले पनि बिद्यालय बन्द गराएको छ ।

हाल देशका बिभिन्न स्थानमा गर्मी बढेपछि धमाधम बिद्यालयहरु बन्द गर्न थालिएको छ ।स्थानिय तहहरुले विद्यालयलाई आगामी समयमा हुने बर्खे बिदाबाट कट्टा हुने गरी हाललाई विद्यालय बन्द गर्न निर्देशन दिईरहेका छन्।

गर्मीका कारण बालबालिकाहरु बिरामी पर्न थालेका छन् । दिनको तापक्रम ४० डिग्रीसम्म पुग्ने गरेको छ ।गर्मी र खानपानका कारण झाडापखालाले बालबालिका प्रभावित हुन थालेका छन् ।