डेङ्गीः धादिङमा संक्रमित २२ सय भन्दा बढि,थप ६२ जनालाई संक्रमण

धादिङ,०८ भदौ।
पछिल्लो २४ घण्टामा ६२ जना डेङ्गीका बिरामी भेटिएका छन्।२२ जना पुरुष र ४० जना महिला गरी थप ६२ जना डेङ्गीका बिरामी भेटिएको स्वास्थ्य कार्यालय धादिङले जनाएको छ।

संक्रमितमध्ये नीलकण्ठ नगरपालिकाका ४४ जना, सिद्धलेकका ५ जना, ज्वालामुखीका ३ जना, धुनीबेशीका ३ जना, गजुरीका ३ जना, बेनिघाट रोराङका २ जना, खनियाबासका १ जना र अन्य जिल्ला परिक्षण १ जना रहेका छन्।

साउन १ यता जिल्लामा संक्रमित हुनेको संख्या २ हजार २३२ पुगेको छ।जसमा पुरुष १ हजार १०१ र महिला १ हजार १३१ जना छन्। हालसम्मको कुल संक्रमितमध्ये १ हजार ९०६ जना निलकण्ठका मात्रै छन् ।

संक्रमणकै कारण धादिङमा एक जनाको मृत्यु समेत भईसकेको छ।

डेङ्गी लामखुट्टेबाट सर्ने रोग हो ।पानी जम्ने सफा ठाउँमा एडिज एजिप्टी र एडिस एल्बोपिक्टस प्रजातिको लामखुट्टेले फुल पार्छ ।ती फुलबाट लार्भा निस्कन्छ र त्यही लार्भा वयस्क भएर टोकेपछि डेङ्गी लाग्छ ।

डेंगीको मुख्य लक्षण एक्कासि उच्च ज्वरो आउने,आँखाको गेडी दुख्ने, ढाड, जोर्नी तथा मांसपेशी दुख्ने, वाकवाकी लाग्ने, वान्ता हुने, रातो बिमिरा देखिने लगाएतका हुन्।

लाम्खुट्टेको टोकाइबाट जोगिनको लागि झुल टाँगेर सुत्ने , खेतबारीमा काम गर्दा लामो बाहुला भएको लुगा लगाउने, घरको झ्यालढोकामा जाली हाल्ने, लामखुट्टे भगाउने धुप वा मलमको प्रयोग गर्ने, घरपालुवा पशुपक्षी व्यवस्थित ढङ्गले पाल्ने र घर वरिपरि गमला, टायर वा कुनै पनि खुला भाँडामा पानी जम्न नदिने प्रमुख उपाय हुन्।