फागुन दोस्रो सातादेखि दादुरा–रुवेला विरुद्धको खोप अभियान सञ्चालन गरिने

स्वास्थ्य तथा जनसंख्या मन्त्रालयले आगामी फागुन दोस्रो सातादेखि देशभरि दादुरा–रुवेला विरुद्धको खोप अभियान सञ्चालन गर्ने भएको छ ।

दादुरा–रुवेला संक्रमणको जोखिमलाई मध्यनजर गर्दै फागुन १३ देखि चैत ७ गतेसम्मनौ महिनादेखि १५ वर्षमुनिका सबै बालबालिकालाई दादुरा–रुवेलाविरुद्धको खोप दिन लागिएको हो ।

भारतसँग सीमा जोडिएका दादुरा–रुवेलाबाट अति संक्रमित २१ जिल्ला तथा काठमाडौं उपत्यकाका काठमाडौं, भक्तपुर र ललितपुरका सबै बालबालिकालाई उक्त खोप लगाइने स्वास्थ्य सेवा विभागको बाल स्वास्थ्य तथा खोप शाखाका प्रमुख डा.अभियान गौतमले बताउनुभयो।

बाँकी ५१ जिल्लाका बालबालिकालाई पनि खोप अभियानमा सहभागी गराइने उहाँको भनाई छ।अभियानमा करिब ५७ लाख बालबालिकालाई खोप लगाउने लक्ष्य रहेको गौतमले बताउनुभयो।