कालिदेवी माविको ६० औ बार्षिकोत्सव तथा अभिभावक भेला सम्पन्न, नवनिर्मित विद्यालय भवन उद्घाटन

धादिङ । सिद्धलेक गाउँपालिका ४ आरुबासमा रहेको कालिदेवी माध्यमिक विद्यालयको बार्षिकोत्सव कार्यक्रम सम्पन्न भएको छ ।

सोमबार विद्यालयको ६० औँ बार्षिकोत्सव तथा अभिभावक भेला सम्पन्न भएको हो ।

विद्यालय व्यवस्थापन समितिका अध्यक्ष खिन प्रसाद त्रिपाठीको अध्यक्षतामा सम्पन्न बार्षिकोत्सव कार्यक्रमका सिद्धलेक गाउँपालिकाका अध्यक्ष परशुराम खतिवडाको प्रमुख आथित्यता तथा उपाध्यक्ष सबिता अर्याल, वडा नं ४ का वडाध्यक्ष झक बहादुर थापा मगर लगाएतको आथित्यता रहेको थियो ।

बार्षिकोत्सवको अवसर पारेर राष्ट्रपति शैक्षिक सुधार कार्यक्रमबाट अनुदान प्राप्त विद्यालय भवनको उद्घाटन गरिएको छ ।

५५ लाखको लागतमा निमार्ण सम्पन्न भएको ४ कोठे भवनको कार्यक्रमका प्रमुख अतिथि खतिवडाले उद्घाटन गर्नुभएको विद्यालयका प्रधानाध्यापक बाबुराम तमाङ्गले जानकारी दिनुभयो।

बार्षिकोत्सवकै अवसरमा गत बर्ष भएको विद्यालयको विविध गतिविधिमा पहिलो, दोस्रो र तेस्रो हुने विद्यार्थीहरुलाई पुरस्कार वितरण गरिएको थियो ।

यसैगरी एसईईमा उत्कृष्ट जिपिए ल्याउने विद्यार्थी सुष्मा अर्याललाई युकेमा रहनुभएका डा.कमल अर्यालले उपलब्ध गराउनुभएको नगद १५ हजार हस्तान्तरण गरिएको छ। डा.अर्यालले विद्यालयमा २ कोठे भवन पनि निर्माण गरिदिनुभएको र २०७३ सालबाट हरेक वर्ष एसईईमा उत्कृष्ट जिपिए ल्याउने विद्यार्थीलाई १५ हजार उपलब्ध गराउर्दै आउनुभएको विद्यालयका प्रधानाध्यापक तमाङ्गले बताउनुभयो ।

कार्यक्रममा गाउँपालिकाका अध्यक्ष खतिवडाले विद्यालयको विकासका लागि गाउँपालिकाले आवश्यक सहयोग गर्ने प्रतिबद्धता जनाउनुभएको छ।विद्यालयले वार्षिक उत्सव मनाउनु सफलता भएकोमा खुसी व्यक्त गर्दै आगामी दिनहरूमा विद्यालयको विकासमा आफ्नो सदैव साथ र सहयोग रहने बताउनुभयो ।साथै आगामी बर्ष विद्यालयमा कक्षा ११ सञ्चालनको लागि पहल गर्ने पनि बताउनुभयो ।

२०२० सालमा अध्यापन सुरु भएको सो विद्यालयमा हाल कक्षा १० सम्म अध्यापन हुँदै आएको छ। विद्यालयमा अहिले २ सय २१ जना विद्यार्थी अध्ययनरत रहेका छन ।