धादिङमा १९ हजार ६ सय भन्दा बढि बालबालिकाले लगाए दादुरा–रुबेलाविरुद्धको खोप

धादिङ । दादुरा–रुबेलाविरुद्धको खोप अभियान सम्पन्न भएको छ ।

धादिङमा १९ हजार ६ सय भन्दा बढि बालबालिकाले दादुरा–रुबेलाविरुद्धको खोप लगाएका छन् ।फागुन १३ गतेदेखि सुरु भएको अभियान आईतबार सकिएकोे हो ।

धादिङमा दुई चरणमा खोप अभियान सञ्चालन गरिएको थियो ।

पहिलो चरणमा सञ्चालन गरिएको धुनिबेसी नगरपालिका, खानियाबास, गंगाजमुना, त्रिपुरासुन्दरी, गजुरी, गल्छी, बेनिघाट रोराङ र थाक्रे गाउँपालिका गरी कुल १३ हजार ७४ जना बालबालिकाले खोप सेवा प्राप्त गरेका छन् ।

यस्तै दोस्रो चरणमा निलकण्ठ नगरपालिका, ज्वालामुखी, सिद्धलेक र नेत्रावती डबजोङ गाउँपालिका गरी कुल ६ हजार ६०१ जना बालबालिकाले खोप लगाएका छन् ।

यो सँगै जिल्लामा अभियान अन्तरगत ८८ दशमलब ५ प्रतिशत अर्थात् १९ हजार ६७५ बालबालिकाले खोप लगाएका छन् ।स्वास्थ्य कार्यालय धादिङले अभियानमा जिल्लाका २२ हजार २३९ बालबालिकालाई खोप लगाउने लक्ष्य राखेको थियो ।

स्थानिय तहमा आरसिएम गरि खोप छुट भएका बाल–बालिका भेटिएमा आजदेखि चैत्र १ गतेसम्म खोप लगाउने व्यवस्था भएको स्वास्थ्य कार्यालयले जनाएको छ ।

दादुरा–रुबेलाविरुद्धको खोप अभियानअन्तर्गत सरकारले देशभरका २४ जिल्लामा सञ्चालन गरेको थियो । अहिलेसम्म झण्डै ६६ प्रतिशत अर्थात् ३७ लाख ९२ हजार ४ सय ६८ बालबालिकाले खोप लगाइसकेका छन् ।

हेर्नुहोस् खोपको सम्पूर्ण विवरण

के हो दादुरा–रुबेला रोग ?
मिजल्स भाइरसका कारण हुने दादुरा छिट्टै सर्ने संक्रामक रोग हो । रुबेला भाइरसका कारण हुने दादुरा जस्तै देखिने अर्को संक्रामक रोग हो रुबेला ।

चाडै महामारीको रुप लिनसक्ने यी रोगहरु विशेषगरी ५ वर्षमुनिका बालबालिकालाई धेरै हुने चिकित्सकको भनाई छ ।

दादुरा संक्रमण भएमा मृत्यु समेत हुनसक्छ। त्यसैगरी, रुबेला भाइरस दादुरा रोगको लक्षण भन्दा सामान्य किसिमको हुन्छ।गर्भावस्थामा रुबेला संक्रमण भएमा समय नपुगी बच्चा जन्मने, मृत बच्चा जन्मिने तथा गम्भीर प्रकारको जन्मजात हुने विकलांगहरू देखा पर्नसक्ने, गर्भपतन हुने जस्ता जटिल समस्या देखिने चिकित्सकले बताएका छन् ।

दादुरा रोग संक्रमित व्यक्तिको नाक तथा घाँटीबाट निस्किने तरल पदार्थको सम्पर्कमा आँउदा, हाच्छ्यूँ गर्दा, र खोक्दा विषाणु हावामा फैलिएर सर्छ।

दादुरा रोगको लक्षण देखिनु भन्दा अघि तथा लक्षण देखिइसकेपछि पनि धेरै दिनसम्म संक्रमितले दादुराका विषाणु सार्दछन्। बालबालिकाहरू समूहमा जम्मा हुने या भिड हुने स्थानहरूमा सजिलैसँग एकअर्कामा सर्नसक्छ।

दादुरा रोगको पहिलो लक्षण उच्च ज्वरो आउनु हो। संक्रमित व्यक्तिको सम्पर्क भएको १०–१२ दिनपछि ज्वरो आउँछ। यो समयमा रोगीको नाकबाट पानी बग्ने, खोकी लाग्ने, आखाँ रातो हुने वा आँशु बग्ने र रोगीको गालाको भित्रीभागमा मसिना सेतो दाग देखापर्छ।

दादुरा–रुबेला विरुद्धको खोप बच्चा जन्मिएको ९ र १५ महिनापछि लगाउनुपर्छ।

बालबालिकालाइ सो समयमा दादुरा–रुबेलाको गुणस्तरीय खोप दुई मात्रा दिएमा पूर्णरुपमा नियन्त्रण र निवारण गर्न सकिने चिकित्सकहरु बताउँछन्।

Photo:Nalang Healthpost