धादिङबेशीे आयुर्वेद औषधालय : १६ शय्यामा स्तरोन्नति,आफ्नै भवन नहुँदा सेवा दिन कठिनाई

धादिङ। सदरमुकाम धादिङबेसीमा रहेको जिल्ला आयुर्वेद औषधालय स्तरोन्नति भएको छ ।

नीलकण्ठ नगरपालिका–३ स्थित नीलकण्ठ बहुमुखी क्याम्पस अगाडी रहेको आयुर्वेद औषधालय आयुर्वेद तथा वैकल्पिक चिकित्सालयको रुपमा विस्तार भएसँगै १६ बेडको अस्पतालमा स्तरोन्नति गरिएको छ ।

तर १६ शय्याको अस्पताल संचालन गर्न मिल्ने आफ्नै भवन नहुँदा सेवा दिन कठिनाई भैरहेको आयुर्वेद तथा वैकल्पिक चिकित्सालय धादिङका प्रमुख डाक्टर अमुल्य दाहालले बताउनुभयो ।चिकित्सालयले अब अस्पताल भवन निर्माण गरी १६ शय्याको अस्पताल मार्फत सेवा प्रदान गर्न लागेको उहाँले बताउनुभयो ।

भौतिक संरचना, वजेट लगायत विविध कारण २५ शय्याको सञ्चालन गर्न समस्या भएर १६ शय्या सञ्चालन गरिएको दाहालले बताउनुभयो । अस्पताल निर्माणका लागि जग्गा लिने प्रक्रिया अघि बढी सकेको भन्दै उहाँले अब औषधालय आएका विरामीलाई भर्ना गरेर पनि सेवा बताउनुभएको छ ।

जग्गा किन्ने र नयाँ भवन निर्माणको काम पूरा नहुन्जेल अहिले तत्कालका लागि घर भाडामा लिएर १६ शय्यामा सेवा प्रवाह गरिने उहाँको भनाई छ । चिकित्सालयले सेवा आरम्भ गरेपछि विरामीहरुलाई चौविसै घण्टा सेवा दिन सकिने बताउनुभयो ।औषधालयमा औषधिको विविधता तथा परिमाण आवश्यकता भन्दा न्यून मात्रै उपलब्ध हुनुले पनि सेवाग्राहीलाई सहज रुपले सेवा दिन अप्ठ्यारो हुने गरेको चिकित्सालयका प्रमुख दाहालले बताउनुभयो ।

आयुर्वेद औषधालय वैकल्पिक उपचार विधि अन्तर्गत बहिरंग सेवा, प्याथोलोजी ल्याव, अकुपंचर सेवा, पुर्वकर्म र पंचकर्म सेवा, फिजिओथेरापी लगायतको निःशुल्क सेवा प्रदान गर्दै आएको छ ।

मुख्यमन्त्री जनता स्वास्थ्य कार्यक्रम मार्फत ३० वर्ष भन्दा माथिका नागरिकको निःशुल्क स्वास्थ्य परीक्षण गर्दै आएको आयुर्वेद चिकित्सकका सूचना अधिकारी प्रकाश सापकोटाले जानकारी दिनुभयो ।

धादिङ र गोर्खाका विभिन्न ठाउँबाट दैनिक २५ जना भन्दा माथि चेकचाँज गर्न विरामीहरु आउने गरेको उहाँले बताउनुभयो । जिल्ला आयुर्वेद स्वास्थ्य केन्द्रबाट बिभिन्न २३ प्रकारको आयुर्वेद औषधी निशुल्क पाउने र शशुल्क फार्मेशीमा बिभिन्न ६० प्रकारको औषधी पाईने पनि बताउनुभयो।

औषाधालयले बिभिन्न स्थानमा भान्साघर औषधालय कार्यक्रम महिला तथा आमा समुहमा समेत सञ्चालन गर्दै आएको छ । जिल्ला भर १० वटा आयुर्वेद संस्थाहरू सञ्चालित छन् ।

धादिङबेशीको चिकित्सालय सहित ६ वटा स्थानीय तह सिद्धलेक, नेत्रावती डवजोङ, खनियाबास, ज्वालामुखी गाउँपालिका र धुनिबेशी नगरपालिकामा नागरिक आरोग्य केन्द्र स्थापना गरी सेवा दिन थालिएको छ भने ज्यामरुङ, गजुरी, बैरनी र सेर्तुङमा औषाधालय सञ्चालनमा छन् ।

आयुर्वेद स्वास्थ्य संस्थाबाट साधारण उपचार, स्तनपायी, ज्येष्ठ नागरिक, पूर्वकर्म पञ्चकर्म, शिविर लगाएतका बिभिन्न कार्यक्रम सञ्चालन गरिदै आएको छ।

विश्वको सबैभन्दा पुरानो चिकित्सा पद्धतिका रुपमा रहेको आयुर्वेद चिकित्सा पद्धति मानिन्छ। यसले गर्दा पनि पछिल्लो समय आयुर्वेद उपचारमा धेरैको आकर्षण बढ्दै गएको छ।