धुनीवेशी नगरपालिका पूर्ण खोप सुनिश्चितता पालिका घोषणा

धार्के । धादिङको धुनिबेशी नगरपालिकालाई पूर्ण खोप सुनिश्चितता पालिका घोषणा गरिएको छ ।

आइतबार एक कार्यक्रमका विच ‘बालबालिका सुरक्षित हुने आधार,पुर्ण खोप सुनिश्चित धुनिवेशी नगर’ भन्ने नाराका साथ नगरपालिकालाई पुर्ण खोप सुनिश्चितता गरिएको हो ।

घोषणा कार्यक्रममा नगरप्रमुख आचार्यले पुर्ण खोप सुनिश्चितताको लागि खट्ने जनप्रतिनिधि, कर्मचारी, स्वास्थ स्वयंसेविका र नगरवासीलाई धन्यवाद दिनुभयो । उहाँले राज्यले प्रदान गर्ने खोप सबैलाई लागाउन आग्रह गर्नुभयो ।

नगरपालिकाले स्वास्थ, शिक्षा र खानेपानीलाई प्रमुख प्राथमिकतामा राखेको भन्दै स्वास्थ स्वयंसेवीकाको सुविधा र सेवाका बिषयमा राज्यले उचित व्यवस्था गर्नुपर्ने बताउनुभयो ।

कार्यक्रममा नगर उपप्रमुख सुरज उप्रेतीले आगामी आर्थिक बर्षमा पनि पुर्ण खोप सुनिश्चितताको लागि आवश्यक पर्ने बजेटको व्यवस्था गर्ने बताउनु भयो ।

जनस्वास्थ्य कार्यालय धादिङका प्रमुख विभु कुमार झाले नगरपालिका टिमसहित नगरवासीलाई बधाई दिदै अहिले मानव पुजी निर्माण गर्ने बेला आएकोले खोपको महत्व बढ्दो क्रममा रहेको बताउनुभयो ।

उहाँले १ हजार २०० बालबालिकामा ९ सय ५० बालबालिकाले पोलियोको आइपिभी खोप लगाएकोमा बाँकी बालबालिका छुटेका भए जानकारी गराउन आग्रह गर्नुभयो ।

कार्यक्रममा गाउँपालिका प्रमुख प्रशासकीय अधिकृत निरज पौडेलले नगरपालिकाले छुटेका बालबालिकालाई खोजी खोजी खोप लगाएको भन्दै खोप लगाउन नमान्ने अभिभावकलाई काउन्सिल गर्नुपर्ने बताउनुभयो ।स्वस्थ र सक्षम नागरिक उत्पादन गर्नका लागी सरकारले पुर्ण खोप सुनिश्चितता कार्यक्रमलाई निरन्तरता दिएको पौडेलको भनाइ छ।

नगरपालिकाको लक्ष्य २७१ जना खोप लगाउने रहेकोमा ३७५ जनाले खोप लगाएका थिए । जस अनुसार ११० प्रतिशत खोप लगाएका थिए ।

सो घोषणा गर्नका लागी नगरका स्वास्थकर्मीले डाटा लिने,सर्भेक्षण गर्ने र खोप नलगाएकाको घरमै गएर खोप लगाउने कार्यक्रम गरेको नगरपालिकाका जनस्वास्थ्य अधिकृत ध्रुव अधिकारीले बताउनु भयो ।

नगरपालिकामा पुर्ण खोप सुनिश्चितता गर्नको लागी प्रत्येक बर्ष नयाँ बच्चाको जन्म, उनिहरुले लगाएको खोपका बिषयमा अध्याबधिक गर्नपर्ने हुन्छ ।

पुर्ण खोप सुनिश्चितता घोषणामा नगरप्रमुख बालकृष्ण आचार्यले सबै वडाका जनप्रतिनिधिलाई धन्यवादसहित पुर्ण खोप सुनिश्चितताको प्रमाणपत्र प्रदान गर्नु भएको थियो।

उक्त कार्यक्रममा जिल्ला जनस्वास्थ प्रमुख श्याम पोखरेलले नगरप्रमुख आचार्यलाई प्रमाणपत्र प्रदान समेत गर्नु भएको थियो।