धादिङमा दलित हक अधिकार कार्यन्वयन सम्बन्धी छलफल : थर सच्याउन समस्या भएको गुनासो

धादिङ,२८ मंसिर ।
धादिङमा दलित हक अधिकार कार्यन्वयन सम्बन्धमा छलफल गरिएको छ । बुधबार जिल्ला प्रशासन कार्यालय धादिङमा राष्ट्रिय दलित आयोगका सदस्य सुन्दर पुर्कुटिको उपस्थितीमा प्रमुख जिल्ला अधिकारी कृष्ण प्रसाद लम्साल, प्रहरी प्रमुख, दलित अधिकारकर्मी लगाएतसँग छलफल गरिएको हो ।

कार्यक्रममा सहभागी दलित अगुवाहरुले नागरिकतामा थर सच्याउन समस्या भएको गुनासो गरेका छन् । दलित अगुवाहरुले अपमानित र हीनताबोध हुने नाम, थर सच्याउन स्थानीय प्रशासनसँग माग गरेका छन् ।

नागरिकता बनाउने क्रममा केही दलित मानिसहरुको नाम, थर अपमानित हुने खालको रहने गरेको भन्दै जिल्ला प्रशासनले त्यस्ता नाम, थर सच्याउन को लागी सहजता गरिदिनुपर्ने माग गरेका छन् ।

कार्यक्रममा राष्ट्रिय दलित आयोगका सदस्य सुन्दर पुर्कुटिले कतिपय नामहरु सुन्दा पनि घृणा जाग्ने खालको भएको भन्दै सम्मानजनक नाम राखेर व्यक्तिको विवरण उल्लेख गर्न प्रशासन समक्ष आग्रह गर्नुभयो ।

उहाँले स्थानीय तहमा दलित समुदायको उत्थानको लागि निति तथा कार्यक्रम कसरी अगाडी बढाईरहेको छ ? जातीय विभेदका मुद्धाहरु आउछन् की आउदैनन् ? छुवाछुत निगरानी केन्द्रहरुको गठन गरेकोे छ वा छैन भनेर सम्बन्धित निकायलाई प्रश्न गर्नुभएको थियो ।

पुर्काेटिले पुष मसान्तसम्म छुट भएका थरहरु सूचीकरणमा राख्ने योजनामा रहेको बताउनुभयो । स्थानीय तहले दलित समुदायका लक्षितका कार्यक्रमलाई कार्यन्वयनमा लैजान आग्रह समेत गर्नुभयो ।

साथै उहाँले दलितको समस्या स्थानीय तहमा बढी रहेको भन्दै टोलछिमेकमा अझै पनि कुनै न कुनैरुपमा दलितमाथि जातीय विभेद हुने गरेकोले राज्यका हरेक निकाय र अधिकारकर्मीहरुले यसतर्फ ध्यान दिनुपर्ने बताउनुभयो ।

छलफलको क्रममा प्रमुख जिल्ला अधिकारी लम्सालले जिल्ला प्रशासन कार्यालय धादिङमा जातिय विभेदका मुद्धाहरु अहिलेसम्म नआएको बताउदै प्रशासनले सबैलाई समावेशी ढंगले सेवा प्रदान गरेको बताउनुभयो ।

यसैगरी आजै नीलकण्ठ नगरपालिकाका उपप्रमुख दिपक विश्वकर्मा लगाएत वडाका दलित जनप्रतिनिधीहरुसँग पनि छलफल गरिएको छ । नगरपालिकाले छ्टयाएको निति तथा बजेट,दलित लक्षित कार्यक्रमहरु लगाएतको विषयमा छलफल गरिएको थियो ।