टोखा नगरपालिकाको १२ औँ अधिवेशन सम्पन्न

काठमाडौँ । टोखा नगरपालिकाको १२ औँ नगरसभाको अधिवेशन सम्पन्न भएको छ ।

शुक्रबार नगरपालिकाको वडा नम्बर ३ स्थित सद्धभाव बैक्वेटमा नगरसभाको १२ औँ अधिवेशन सम्पन्न भएको हो । नगरसभामा नगरका उपप्रमुख मुरारी तामाङले चालू आर्थिक वर्ष २०७९/०८० मा स्वीकृत योजना कार्यक्रम तथा बजेटको हालसम्मको कार्यान्वयनको अवस्थाबारे समीक्षा प्रस्तुत गरेका थिए ।

नगर उपप्रमुख तामाङका अनुसार चालू आर्थिक वर्ष  नगरपालिकाको ११ औँ नगरसभाबाट २ अर्व ११ करोड ५६ लाख ७ हजार बजेट विनियोजन गरिएको थियो ।

सोमध्ये हालसम्म चालू तर्फ १७ करोड ४१ लाख ५७ हजार अर्थात् २४ दशमलव ६५ प्रतिशत, पूजीतर्फ १६ करोड ४९ लाख ७४ हजार अर्थात् ११ दशमलव ७१ प्रतिशत गरी कूल ३३ करोड ९१ लाख ३१ हजार अर्थात् १६ दशमलव २ प्रतिशत खर्च भएको छ । चालू आर्थिक वर्षमा ९२६  वटा विकास योजना स्वीकृत कार्यक्रममध्ये ३४९ कार्यान्वयनमा आएको  उपप्रमुख  तामाङले बताए ।

त्यसमध्ये १६७ वटा योजना सम्पन्न  भइसकेको र अन्य कार्यान्वयनको चरणमा रहेको उनले जानकारी दिएका छन् । उनका अनुसार आर्थिक विकासमा २० दशमलव  ६२ प्रतिशत, सामाजिक विकासमा   १५ दशमलव ८१, पूर्वाधार विकासमा १४ दशमलव १४ प्रतिशत, वातावरण तथा विपद् व्यवस्थापनमा शुन्य दशमलव ६७ प्रतिशत, संस्थागत विकास, सेवा प्रवाह, सुशासन तथा अन्तर सम्बन्धित क्षेत्रमा २४ दशमलव ४६ प्रतिशत खर्च भएको छ ।

उनले नगरपालिकाले अन्य योजनालाई क्रमश  कार्यान्वयन गर्ने तयारीमा रहेको जानकारी दिएका छन् । नगरसभाबाट पारित भएका योजना तथा कार्यक्रमहरु समयमानै सम्पन्न गरी सत प्रतिशत प्रगती हसिल गर्ने गरी काम गर्न जोड दिएका  छन् ।