बेनीघाट रोराङका सहिद तथा वेपत्ता परिवारलाई गाउँपालिकाले ५० हजार दिने

धादिङ,११ माघ ।
धादिङको बेनीघाट रोराङ गाउँपालिकाले पालिका भित्रका सहिद तथा वेपत्ता परिवारहरुलाई प्रति परिवार ५० हजार दिने भएको छ ।

सहिद तथा वेपत्ता परिवारहरुको आय आर्जनका लागि पालिका भित्रका २७ जना परिवारलाई प्रति परिवार ५० हजार वितरण गरिने गाउँपालिकाका अध्यक्ष कृष्ण बहादुर थपलिया (विवेक)ले बताउनुभयो ।

मंगलबार आयोजित सहिद तथा वेपत्ता परिवारहरुका लागि संचालित आयआर्जनको लागि क्षमता अभिमुखिकरण कार्यक्रममा गाउँपालिकाका अध्यक्ष थपलियाले सहिद परिवारलाई गाउँपालिकाले उपलब्ध गराउने उक्त रकम विउ पुँजी सहित सदुपयोग गर्न आग्रह गर्नुभएको छ ।

गाउँपालिकाले उपलब्ध गराएको रकमको सदुपयोग भएको नभएको अनुगमन गर्ने बताउदै काम नगर्नेलार्ई अर्को वर्ष देखि सहयोग नगर्ने समेत उहाँले बताउनुभयो ।

यस्तै गाउँपालिका उपाध्यक्ष टाप बहादुर श्रेष्ठले सहिद परिवार लक्षित कार्यक्रम गाउँपालिकाले स्वरोजगार सँग जोडेर आर्थिक सहयोग गर्न लागेको बताउनुभयो ।

यस वर्ष सहिद तथा वेपत्ता परिवारमा गाउँपालिकाले ३ चरणका कार्यक्रम राखेको पालिकाले जनाएको छ । जसमा पहिलो चरणको कार्यक्रम अध्यक्षद्वारा न्यानो कपडा वितरण, दोस्रो चरणमा आय आर्जनका लागि प्रति परिवार ५० हजार वितरण गर्ने र तेस्रो चरणमा सहिद परिवार सम्मान कार्यक्रम रहको पालिकाले जनाएको छ ।