गंगाजमुनामा बजार अनुगमन जारीःउपभोक्ताको स्वास्थ्यमा खेलबाड नगर्न व्यवसायीलाई निर्देशन

धादिङ,२१ माघ।

धादिङको गंगाजमुना गाउँपालिकामा बजार अनुगमन जारी रहेको छ । उपभोक्ताको स्वास्थ्य, सुविधा र आर्थिक हित कायम राख्न,उपभोग्य वस्तु वा सेवाको गुणस्तर,परिमाण एवं मूल्यको अनियमितताबाट उपभोक्तालाई संरक्षण प्रदान गर्न गाउँपालिकाले केही दिनदेखी बिभिन्न स्थानमा अनुगमन गरिरहेको छ ।

शुक्रबार वडा नं ५ स्थित तिनखण्डे, ढाँपबजार लगायतका स्थानमा अनुगमन गरिएको गाउँपालिकाले जनाएको छ ।बजार अनुगमनको क्रममा व्यवसायिक कारोबारको दर्ता,नविकरण,आपूर्ति, मूल्य, गुणस्तर, नापतौल, उत्पादन भएको र त्यसको म्याद सकिने मिति, मूल्यसूची, प्याकेजिङ् लगायतमा विशेष अनुगमन गरिएको गाउँपालिकाका प्रमुख प्रशासकिय अधिकृत अनिल श्रेष्ठले जानकारी दिनुभयो ।

साथै म्याद गुर्जिएका सामाग्री जफत गर्नुका साथै ब्यवसाय दर्ता, नवीकरण नभएका पसलहरूलाई ७ दिनभित्र नवीकरण गर्न र अनिवार्य मुल्यसुची राख्न पनि निर्देशन दिइएको श्रेष्ठले बताउनुभयो ।

बजार अनुगमनलाई तीब्र रूपमा अगाडी बढाउने उहाँको भनाई छ । गाउँपालिकाका प्रमुख प्रशासकिय अधिकृत श्रेष्ठले व्यवसायीहरूलाई उपभोक्ताहरूको स्वास्थ्यमा खेलबाड नगर्न र नागरिकहरुले पनि विशेष ध्यान दिन आग्रह गर्नुभएको छ।