धादिङको खनियाबासमा ट्रकले किचेर एक बालकको मृत्यु

धादिङ,०१ फागुन ।
धादिङको खनियाबास गाउँपालिका वडा नम्बर ३ कुरिमा आईचर ट्रकले किचेर एक बालकको मृत्यु भएको छ ।

आज साँझ बा ३ ख ३३६० नम्बरको ट्रकले किचेर कुरिका सिंहबहादुर तामाङको १० बर्षिय छोरा रोहित तामाङ (बिक्सो) को घटनास्थलमै मृत्यु भएको खनियाबास–३ का वडाध्यक्ष कमानसिंह तामाङले जानकारी दिनुभयो ।

नुवाकोट त्रिशुलीबाट गाउँमा खाद्यान्न सामाग्री बिक्री गर्न गएको ट्रकले पछाडि ब्याक गर्ने क्रममा बालकको टाउकोमा किच्दा घटनास्थलमै मृत्यु भएको वडाअध्यक्ष तामाङले बताउनुभयो ।

बालकको शव पोस्टमार्टमको लागि धादिङबेशी ल्याउने तयारी भइरहेको र ट्रक चालकलाई प्रहरीले नियन्त्रणमा लिएको वडाअध्यक्ष तामाङले बताउनुभयो । मृतक बालक कक्षा २ मा अध्ययनरत थिए ।