धुनिवेशी र थाक्रे जोड्ने गणेशखोला पुल भासियो,पृथ्वी राजमार्ग ठप्प

धादिङ,१८ बैशाख।
धादिङको धुनिवेशी नगरपालिका र थाक्रे गाउँपालिका जोड्ने गणेश खोलामाथिको पुल भासिएको छ ।

आज दिउँसोको बर्षाले धुनिवेशी नगरपालिकाको वडा नम्बर ६ स्थित धार्के तर्फको पुलको एकापट्टीको भाग भासिँदा पृथ्वी राजमार्ग पुर्णरुपमा अवरूद्ध भएको छ ।

वैकल्पिक बाटो खुलाउन स्थानीय तह र सडक विभागसँग समन्वय गरिरहेको प्रहरीले जनाएको छ। भासिएको पुलमा ग्यावीन जाली राखेर बाटो खुलाउने भनिए पनि तत्काल सडक खुल्ने अवस्था नरहेको प्रहरीले जनाएको छ ।

अहिले दुईतर्फी सवारी आवागमन रोकिएको छ ।  सो मार्ग भएर चल्ने सवारी साधन रोकिएका छन् । प्रहरीले वैकल्पिक बाटोको प्रयोग गर्न अनुरोध गरेको छ ।

सडक आयोजनाले उक्त भासिएको पुलसँगै नयाँ पुल निर्माणको काम समेत थालेको थियो। तस्विर : राजाराम डंगोल