गंगाजमुनाका वडावडामा बालक्लव संञ्जाल गठन,बालबालिका तथा सरोकारवालालाई अभिमुखिकरण

फुलखर्क,०७ असार ।
गंगाजमुना गाउँपालिकाको वडावडामा बालक्लव संञ्जाल गठन गरिएको छ। गाउँपालिकाले वडा स्तरीय बालभेला तथा वडास्तरीय बाल क्लब संजाल गठन प्रक्रियालाई प्राथमिकता राखि वडा नं १ देखि ५ सम्म वडा स्तरीय बालभेला तथा अभिमुखिकरण गरि प्रत्येक वडामा ११/११ सदस्यीय वडा स्तरीय बालक्लब संञ्जाल गठन गरेको छ ।

सम्बन्धित वडा कार्यालयहरु ताजिमाग्राङ, तावल, गुम्दी, सातदोबाटो र फुलखर्कमा भएको वडा स्तरीय बालभेला तथा अभिमुखिकरण कार्यक्रममा सम्बन्धित वडा भित्र रहेका हरेक बिद्यालयबाट समाबेसी आधारमा छनौट भई आएका बालबालिकाहरुको सहभागी रहेको थियोे ।

नेपालले बालबालिकाको सहभागीताको अधिकारलाई मौलिक हकको रूपमा आत्मसात गरेको छ । बालसमूह गठन तथा परिचालन निर्देशिका २०७४ तथा स्थानीय सरकार सञ्चालन ऐन, २०७४ ले समेत स्थानीय सरकारले बालअधिकार सुनिश्चित गर्नका निम्ति स्थानीय सरकारले स्थानीय तहको योजना तर्जुमा गर्दा बालक्लव र बालबालिकाको सहभागीता सुनिश्चित गर्नुपर्ने कुराको उल्लेख भए बमोजिम वडा स्तरीय बालभेला गरिएको महिला,बालबालिका तथा जेष्ठ नागरिक शाखाका प्रमुख उषा लामिछानेले बताउनु भयो ।

बालमैत्री स्थानीय शासनको सूचक नं ४१. स्थानीय तहको योजना तर्जुमा पूर्व वार्षिक रूपमा वडा र गाउँपालिका तहमा बालभेला आयोजना गरी बालभेलाले प्राथमिकता तोकेका विषयलाई स्थानीय तहको योजना तर्जुमा प्रक्रियामा समावेश गरिनु पर्ने व्यवस्था अनुसार गंगाजमुना गाउँपालिकाले बालभेला तथा वडा स्तरीय बालक्लल गठन र परिचालनलाई महत्व दिएको गंगाजमुना गाउँपालिकाका प्रमुख प्रशासकिय अधिकृत अनिल श्रेष्ठले बताउनु भयो ।

बालबालिकाहरुको भेला भई आफ्ना वास्तविक आवश्यकता र प्राथमिकता निर्धारण गर्न,तय गरिएका आवश्यकता र प्राथमिकताहरूलाई स्थानीय योजना तर्जुमा र बजेट विनियोजन सम्बन्धी निर्णय गर्ने संरचना र पदाधिकारी समक्ष राखी बालबालिकाको सर्वोत्तम हित हुनेगरी कार्य गर्ने अवसर सृजना गर्ने भएकोले पनि गाउँपालिकाले वडा बालभेला गरि वडास्तरीय संजाल निर्माण कार्यलाई प्राथमिकता राखिएको पनि प्रमुख श्रेष्ठले बताउनुभयो ।

बालबालिकाको अर्थपूर्ण सहभागीता वृद्धि गर्न सहयोग पुग्नुको साथै बालबालिकालाई स्थानीय शासन र लोकतान्त्रिक पद्धतिमा सहभागी हुने अवसर प्राप्त हुने पनि प्रमुख श्रेष्ठले बताउनु भयो । वडा कार्यालयहरुमा भएको वडा स्तरीय बालभेला तथा अभिमुखिकरण कार्यक्रममा बालक्लबका अध्यक्षहरुको अध्यक्षता तथा सचिवहरुले संचालन गर्नु भएको थियो ।

वडा स्तरीय बालभेला तथा अभिमुखिकरण कार्यक्रममा सम्बन्धित वडाका वडाध्यक्षहरु बहादुर तामाङ,बल बहादुर तामाङ ,राज कुमार गुरुङ ,प्रेम बहादुर घले र कुमार बहादुर अधिकारीको प्रमुख आतिथ्यता रहेको थियो भने बिद्यालयका बालक्लबका सहयोगी शिक्षकहरुको सहभागी रहेको थियो ।

असार ११ गते विद्यालय, वडा स्तरीय बालक्लब हुँदै छनौट भई आएका बालबालिकाहरुको सहभगीतामा पालिका स्तरीय बाल भेला तथा संजाल गठन गर्ने तयारी गरिएको महिला तथा बालबालिका शाखा प्रमुख उषा लामिछानेले जानकारी दिनु भयो । बालभेला तथा अभिमुखिकरण कार्यक्रमको बाल अधिकार अभियन्ता दामोदर अर्यालले सहजिकरण गर्नुभएको थियो ।