धुनिवेशीको सार्वजनिक सुनुवाईःनगरपालिकाको कमजोरीमा खबरदारी गर्न आचार्यको आग्रह

धादिङ,३० असार।
धादिङको धुनिवेशी नगरपालिकाको सार्वजनिक सुनुवाई कार्यक्रम सम्पन्न भएको छ।

आर्थिक बर्ष २०७९/८० मा हालसम्म सम्पन्न भएका काम र सेवा प्रवाहका सन्दर्भमा शुक्रबार कार्यालय प्राङ्गणमा सार्वजनिक सुनुवाई कार्यक्रम गरिएको हो ।

कार्यक्रममा सहभागीहरुले शिक्षा, स्वास्थ्य, कृषि,पशु बीमा, खानेपानी, लक्षित वर्गको कार्यक्रम र बजेट लगायतका विषयमा प्रश्न उठाएका थिए।

कार्यक्रममा उठेका सवाल र जिज्ञासाको नगरपालिका प्रमुख बालकृष्ण आचार्य, उपप्रमुख सुरज उप्रेती, प्रमुख प्रशासकीय अधिकृत अच्युतराज रेगमी र विषयगत शाखाका प्रमुखहरुले जवाफ दिएका थिए ।

प्रश्नहरुको जवाफ दिदै नगर प्रमुख आचार्यले नगरपालिकाको कमजोरीमा खबरदारी गर्न आग्रह गरे ।उनले नगरपालिकाबाट प्रवाह भएको सेवाको बारेमा समस्या, गुनासा निर्धक्क राख्न पनि अनुरोध गरे ।

आचार्यले प्रदेश सरकारले सञ्चालन गरेका कार्यक्रम तथा योजनाका बारेमा धेरै गुनासो आएको तथा हामीले अनुगमन गर्न नपाउने भएका कारण राम्रो काम नभएको बताए ।