च्याडु नजिकैको पहिरोले अवरुद्ध धादिङबेसी-मलेखु सडक खुलाउन अझै केही घण्टा लाग्ने

धादिङ,०३ श्रावण।
नीलकण्ठ नगरपालिका-८ च्याडु घुम्ती नजिकै सडक माथीबाट खसेको पहिरोले अवरुद्ध धादिङबेसी मलेखु सडक खुलाउन अझै केही घण्टा लाग्ने भएको छ ।

बुधबार अपह्रान्हदेखी अवरुद्ध धादिङबेसी मलेखु सडक (कालुपाण्डे मार्ग) खुलाउन अझै ३-४ घण्टा लाग्ने नीलकण्ठ–८ का वडा अध्यक्ष प्रकाशकुमार श्रेष्ठले जानकारी दिनुभयो।

अहिले त्यस क्षेत्रमा सवारीको लाम लागेको छ । घुम्ती कटेर सडक चौडा गरेको स्थानमा कमजोर बनेको जमिन भासिएर पहिरोसंगै ठुल्ठुला ढुंगा सडकमा खसेको वडा अध्यक्ष श्रेष्ठले बताउनुभयो ।

दिउसैदेखि डोजरको प्रयोग गरेर सडकमा खसेको ढुंगा माटो पन्छाउने काम भैरहेपनि सडक खुलाउन अझै केही समय लाग्ने उहाँको भनाई छ। पहिरो खसेको ठाउँ उकालो र साँघु घुम्तीसंगै भएकोले जोखिम अत्याधिक रहेको प्रहरीले जनाएको छ ।

सडक खुलाउन अझै ३/४ घण्टा भन्दा बढी नै लाग्ने देखिएकोले वैकल्पिक व्यवस्थापन गर्न पनि प्रहरीले अनुरोध गरेको छ ।

राजधानी काठमाडौं र अन्यत्र जिल्लाहरुबाट सदरमुकाम धादिङबेसी आवतजावत गर्ने मुख्य सडक नै अवरुद्ध भएसँगै यात्रुहरु अलपत्र परेका छन् ।तस्विर शंकर श्रेष्ठ