अरिंगालले टोक्दा एकजनाको मृत्यु,एक गम्भीर घाइते

अरिंगालले टोक्दा तनहुँमा एकजनाको मृत्यु भएको छ । अर्का एक गम्भीर घाइते भएका छन्।

जिल्लाको भानु नगरपालिका ७ रम्गाटार स्थित जंगलमा आइतबार राति १२ बजेतिर अरिङाल पोल्ने क्रममा घाइते भएका भानु–४ फला खेतका ३२ वर्षीय राजकुमार तामाङको मृत्यु भएको प्रहरीले जनाएको छ। अरिंगालले टोक्दा २४ वर्षीय धनबहादुर तामाङ गम्भीर घाइते भएका छन्।

अरिंगालले टोकपछि घाइते भएका दुवै जनालाई लक्ष्मी अस्पताल डुम्रे तनहुँमा प्राथमिक उपचार पश्चात् थप उपचारका लागि चितवन मेडिकल कलेजमा चितवनमा पठाएको थियो।

उपचारको क्रममा सोमबार बिहान राजकुमारको मृत्यु भएको र घाइते धनबहादुरको उपचार भइरहेको प्रहरीले जनाएको छ।