धादिङका सात वटा रिसोर्टलाई -याफ्टिङ सेवा बन्द गर्न प्रशासनको निर्देशन

धादिङ। जिल्ला प्रशासन कार्यालय धादिङले जिल्लाका सात वटा रिसोर्टलाई -याफ्टिङ सेवा बन्द गर्न निर्देशन दिएको छ।

बेनिघाट राेराङको विभिन्न स्थानमा सन्चालनमा रहेका रिसोर्टहरुले सम्बन्धित निकायबाट सञ्चालन अनुमति नलिई तथा सेवा लिने यात्रु/सेवाग्राहीकाे सुरक्षा बिमा समेत नगरी -याफ्टिङ सेवा सञ्चालन गरेको भन्दै सेवा बन्द गर्न निर्देशन दिएको हो।

प्रशासनका अनुसार बेनिघाट राेराङ-३ को राेयल रिभर साइट -याफ्टिङ रिसोर्ट, बुढी गण्डकी रिसोर्ट, विग सि रिसोर्ट, बेनिघाट राेराङ-५ को नेचुरल रिसोर्ट, माईलस्टाेन भिलेज रिसोर्ट, बेनिघाट राेराङ-७ को चराैंदी विच रिसोर्ट र हाेलिडे विच रिसोर्टलाई सेवा बन्द गर्न निर्देशन दिइएको छ।

जलयात्रा (-याफ्टिङ) मुलुककाे पर्यटन क्षेत्रकाे विकाससँग प्रत्यक्ष रूपमा जाेडिएकाे व्यवसाय भएपनी अवैध र असुरक्षित रहेको पाईएपछि अनुमति र बिमा सम्बन्धी कागजात पेश नगर्दा सम्मका लागि सेवा बन्द गर्न निर्देशन दिएकाे प्रशासनले जनाएको छ।

निर्देशनको अवज्ञा गरि सन्चालन गरेको पाइएमा कानुन बमोजिम कारबाही गरिने पनि प्रशासनले जनाएको छ।