वालक्लवका पदाधिकारीहरुका लागि क्षमता विकास कार्यशाला

चोके रिगाउँ । धादिङको गंगाजमुना गाउँपालिकाले वालक्लवका पदाधिकारीहरुको लागि क्षमता विकास कार्यशाला सञ्चालन गरेको छ ।

शनिवार गंगाजमुना गाउँपालिकाको वडा नं १ र २ वालक्लवका पदाधिकारीहरुको लागि आयोजित कार्यशाला समापन पछि वडा स्तरीय वाल क्लव संजाल पुर्नगठन गरिएको छ।

वडा नं १ मा यावेश तामाङको अध्यक्षतामा ९ सदस्यीय र वडा नं २ मा श्रेया तामाङको अध्यक्षतामा ११ सदस्यीय संञ्जाल पुर्नगठन गरिएको छ ।

वडा नं १ को हिमालय आवि चोकेमा भएको बालक्लबका पदाधिकारीहरुको वडा स्तरीय क्षमता विकास कार्यशालामा सम्बन्धित वडा भित्र रहेका हरेक बिद्यालयबाट समाबेसी आधारमा छनौट भई बिद्यालय र वडा बाल संजालमा रहेका पदाधिकारी तथा सदस्यहरुसहित ५७ जना सहभागी थिए।

नेपालले बालबालिकाको सहभागीताको अधिकारलाई मौलिक हकको रूपमा आत्मसात गरेको छ ।

बालसमूह गठन तथा परिचालन निर्देशिका २०७४ तथा स्थानीय सरकार सञ्चालन ऐन, २०७४ ले समेत स्थानीय सरकारले बालअधिकार सुनिश्चित गर्नका निम्ति स्थानीय सरकारले स्थानीय तहको योजना तर्जुमा गर्दा बालक्लव र बालबालिकाको सहभागीता सुनिश्चित गर्नुपर्ने कुराको उल्लेख भए बमोजिम वडा स्तरीय बालक्लब संञ्जाल पदाधिकारीहरुको क्षमता विकास कार्यशाला गरिएको महिला ,बालबालिका तथा जेष्ठ नागरिक शाखाका प्रमुख प्रतिमा भट्टले बताउनुभयो ।

कार्यक्रममा बालअधिकार,वालक्लव बिधान,गाउँपालिकामा आवद्धता,काम कर्तव्य, अधिकार र उत्तरदायित्व, वालक्लवले समुदाय र बिद्यालय तहमा गर्न सक्ने कामहरु लगायतका बिषयमा बाल अधिकार अभियन्ता तथा प्रयास नेपालका कार्यकारी निर्देशक दामोदर अर्याल र सन्तोष सत्याले सहजिकरण गर्नु भएको रिगाउँबाट प्रमिता भट्टले जानकारी दिनुभयो ।