जिल्ला विपद् व्यवस्थापन समिति धादिङको अनुरोध !

धादिङ,१६ असार ।
यस वर्षको मनसुन सक्रिय भइसकेको छ । मनसुनको सुरुवातसँगै मुलुकका विभिन्न क्षेत्रमा मनसुनजन्य विपदका घटना घट्न गई ठुलो धनजनको क्षति भइसकेको छ ।यसै सन्दर्भमा मनसुनजन्य विपदप्रति सचेत रही जोखिम न्युनिकरण गर्न तथा विपद् पीडितको उद्धार,राहत लगायतका कार्यलाई व्यवस्थित बनाउन देहायका कार्य गर्नु÷गराउनुहुन जिल्ला विपद् व्यवस्थापन समिति,धादिङ सम्बन्धित सबैमा अनुरोध गर्दछौ ।

१. जल तथा मौसम विज्ञान विभाग एवम राष्ट्रिय आपतकालिन कार्य संचालन गर्न (NEOC) बाट सुचना प्राप्त गरी आवश्यक सतर्कता अपनाउने, खोला नदीका किनार, पहिरो सम्भाव्य भीर पाखा तथा अन्य विपद जमोखिमयुक्त स्थानमा बसोबास गर्ने व्यक्तिहरु थप सर्तक रही सम्बन्धित स्थानिय तहको समन्वयमा सुरक्षित आश्रयस्थलका पहिचान गरी बस्ने।

२. बाढी आएको समयमा नदी नालामा माछा मार्ने, पौडी खेल्ने, काठ दाउरा संकलन गर्ने जस्ता कार्यलाई निषेध गर्ने।

३. मनसुनजन्य विपद् पश्चात विभिन्न प्रकारका महामारी एंव रोगको संक्रमण फैलिन सक्ने हुँदा सो तर्फ समेत सतर्क रहने।

४. अत्यावश्यक सामाग्री (जस्तै खानेकुरा, कपडा, औषधी,पानी आदि) हरुको आवश्यक भण्डारण गर्ने।

५. महिला बालबालिका, जेष्ठ नागरीक तथा अपाङ्गता भई जोखिममा रहेका व्यक्तिहरुको सुरक्षामा विषेश ध्यान दिने।

६. विपद् जोखिम न्युनिकरण तथा व्यवस्थापनको लागि जिम्मेवार सबै निकाय/संस्थाहरु आवश्यक जनशक्ति र स्रोत साधन सहित तयारी अवस्थामा रहने,स्थानिय समुदायले समेत आवश्यक सहयोग र सहजीकरण गर्ने।

७. विपद् पीडितको उद्धार तथा राहत कार्यमा सबै क्षेत्र, निकायले आवश्यक सहजीकरण गर्ने,जिल्ला प्रशासन कार्यालय तथा सम्बन्धित स्थानिय तहसँगको समन्वयमा मात्र राहत वितरण गर्ने।

८. विपद् सम्बन्धि घटनाको भ्रम सिर्जना गर्ने, अफवाह फैलाउने, सामाजिक सद्भाव खलबलाउने, कानुन विपरितका गतिविधि गर्ने तथा उद्धार एंव राहत कार्यमा अवरोध सिर्जना गर्ने जस्ता कार्य नगर्ने/नगराउने।

९. विपद्को समयमा अत्यावश्यक वस्तुहरुको कृत्रिम अभाव सिर्जना गर्ने, मंहगी तथा कालााबजारी गर्ने, अखाद्य बस्तुहरुको विक्रिवितरण गर्ने जस्ता उपभोक्ता हित विरुद्धका कार्य नगर्ने/नगराउने।

१०. विपद्को उच्च जोखिम देखिएमा, विपदजन्य घटना घटेमा वा कानुन विपरितको कुनै कार्य भएमा तत्काल नजिकको प्रहरी ईकाई, स्थानिय तह वा जिल्ला आपतकालिन कार्य संचालन केन्द्र DEOC सम्पर्क नं ०१०–५२१४६४) मा सम्पर्क गर्ने।