धादिङमा बिभिन्न कार्यक्रम गरी मनाईयो अन्तर्राष्ट्रिय श्रमिक महिला दिवस

धादिङ,२४ फागुन ।
आज मार्च ८ अर्थात् ११३ औं अन्तर्राष्ट्रिय श्रमिक महिला दिवस,धादिङसहित विश्वभर विभिन्न कार्यक्रम गरेर मनाइएको छ । ’लैङ्गिक समनताका लागि बलियो आधार, सिर्जनात्मक प्रबिधिमा महिलाको पहुँच’’ भन्ने राष्ट्रिय नाराका साथ आज धादिङसहित देशभर पनि विभिन्न कार्यक्रम गरी यो दिवस मनाइएको छ ।

दिवसको अवसरमा धादिङको नीलकण्ठ नगरपालिकामा वक्तृत्वकला प्रतियोगिता तथा अन्तरक्रिया कार्यक्रम आयोजना गरिएको थियो । नगरपालिकाको आयोजनामा श्रममा महिला पुरुष बराबरी, समृद्ध नेपालमा हाम्रो हिस्सेदारी भन्ने विषयमा वक्तृत्वकला प्रतियोगिता सम्पन्न भएको छ ।

पाँच जना सहभागि प्रतियोगितामा नीलकण्ठ–१२ की रीता खनाल प्रथम, सरिता तामाङ द्वितीय, नमिता अधिकारी तृतीय र सपना अर्याल शान्वतना हुनुभएको छ । प्रथम,द्धित्तिय, तृतिय र शान्तवना हुनेहरुलाई क्रमश नगद ५ हजार, ४ हजार, ३ हजार र २ हजार र प्रमाणपत्र प्रदान गरिएको थियो । दिवसको अवसरमा जिल्लाका बिभिन्न स्थानिय तहमा बिबिध कार्यक्रम गरी मनाईएको छ ।

कसरी सुरु भयो नारी दिवस ?

सन १९०८ मो न्यूयोर्क सिटीमा १५ हजार महिलाले सामूहिक रुपमा नै काम गर्ने समय थोरै हुनुपर्ने, राम्रो समान ज्याला दिनुपर्ने र मतदानको अधिकार हुनुपर्ने मागसहित वृहत ¥यालीमार्फत महिला आन्दोलन गरेका थिए । आन्दोलनको माग सम्बोधनसहित त्यसको एक वर्षपछि अमेरिकाको तत्कालीन समाजवादी पार्टीले पहिलो पटक अमेरिकामा राष्ट्रिय महिला दिवस घोषणा गरेको थियो ।

तर, अमेरिकामा मात्रै होइन, यसलाई अन्तर्राष्ट्रिय दिवस बनाउनुपर्ने भन्दै सुरुमा नारीवादी नेतृ क्लारा जेट्किनले बहस सुरु गरिन् । सन १९१० मा कोपनहेगनमा भएको कामकाजी महिलाको अन्तर्राष्ट्रिय सम्मेलनमा उनले यो विषयलाई औपचारिक रुपमा प्रवेश गराइन्, जुन सम्मेलनमा १७ देशका १०० भन्दा बढी महिला नेतृहरुको सहभागीता रहेको थियो । जेट्किनको यो प्रस्तावमा सहभागी सबै राष्ट्रका महिलाहरुले सहमति जनाए ।
सो सम्मेलनपछि पहिलो पटक सन १९११ मा अन्तर्राष्ट्रिय महिला दिवसको रुपमा अस्ट्रिया, जर्मनी, डेनमार्क र स्विटजरल्यान्डामा औपचारिक रुपमा नै मनाउन सुरु गरियो । क्रमशः अन्य देशले पनि यस दिनलाई अन्तर्राष्ट्रिय महिला दिवसको रुपमा मनाउन सुरु गरे । यो आ–आफनो देशअनुसार मनाउने चलन क्रमशः बढ्दै गयो ।

सन १९१७ मा भएको युद्धकालीन आन्दोलनमा रुसी महिलाहरूले ‘रोटी र शान्ति’ को माग नगर्दासम्म यसले औपचारिकता पाएको थिएन । सो आन्दोलनले महिला आन्दोलनलाई झनै उचाइमा लगिदियो ।

सो महिला आन्दोलनको चार दिनपछि रुसका तत्कालीन सम्राट पद त्याग्न बाध्य भए र त्यहाँको अस्थायी सरकारले महिलालाई मतदानको अधिकार दियो ।

संयुक्त राष्ट्रसङ्घले सन् १९७५ मा यो दिवस मनाउन थालेपछि मात्र बल्ल यसले विश्वभरका लागि आधिकारिक मान्यता पायो र राष्ट्र संघका सबै सदस्यले यसलाई संसारभर मनाउन थाले ।