नेत्रावती डवजोङमा सामुदायिक मेलमिलाप सम्बन्धी आधारभुत तालिम सञ्चालन

धादिङ,२८ फागुन ।
नेत्रावती डवजोङ गाउँपालिकामा सामुदायिक मेलमिलाप सम्बन्धी ८ दिवसिय आधारभुत तालिम सम्पन्न भएको छ ।

गाउँपालिकाको आयोजना तथा परिवर्तन र दिगो विकासका लागि युवा सिन्धुलीको सहयोगमा ‘विवादको साटो मेलमिलापको बाटो’ भन्ने नारासहित नेत्रावती डवजोङ-३ स्थित सेमजोङमा २० गतेदेखी सुरु भएको ८ दिवसिय आधारभुत तालिम २७ गते शनिबार सम्पन्न भएको हो ।

समुदाय स्तरमा हुने विभिन्न विवादलाई मेलमिलापका माध्यमबाट समुदायमै मिलाउने उद्देश्यले मेलमिलाप सम्बन्धी आधारभुत तालिम सञ्चालन गरिएको गाउँपालिकाकी उपाध्यक्ष सिता माया गुरुङले जानकारी दिनुभयो ।

तालिममा मेलमिलापको महत्व, मेलमिलापले सामाजिक द्धन्द व्यवस्थापनमा पुर्याउने सहयोग लगाएतका विषयमा सिकाइएको थियो । तालिममा २५ जनाको सहभागीता रहेको थियो । तालिममा सहभागिहरुलाई प्रमाणपत्र वितरण गरिएको उपाध्यक्ष गुरुङले बताउनुभयो ।

गाउँपालिकाकी उपाध्यक्ष तथा न्यायिक समिति संयोजक गुरुङको अध्यक्षतामा भएको समापन कार्यक्रममा गाउँपालिकाका अध्यक्ष मेघनाथ रिजालको प्रमुख आतिथ्यता प्रमुख प्रशासकिय अधिकृत हरेराम शाहको बिशेष आतिथ्य रहेको थियो ।

कार्यक्रममा वडा नं १ का वडाध्यक्ष ठाकुर गुरुङ,वडा नं ३ का वडाध्यक्ष सुरेश गुरुङ लगाएतको आतिथ्यता रहेको थियो ।