धादिङसहित देशका धेरै ठाउँमा वर्षा:सक्रिय प्रणाली भोलि दिउँसोसम्म रहने,पर्सिदेखि फेरि बदली

धादिङ,१८ चैत ।
अहिले धादिङसहित देशका सबैजसो ठाउँमा मौसम बदली भएर धेरै ठाउँमा पानी परिरहेको छ ।

मौसम पूर्वानुमान् महाशाखाका अनुसार हिजोदेखि पानी पार्न थालेको मौसमी प्रणालीका कारण आज पनि तराई र पहाडी क्षेत्रमा वर्षा तथा उच्च पहाडी र हिमाली क्षेत्रमा हिमपात भइरहेको छ ।

देशका केही ठाउँमा भारी वर्षा समेत भएको छ । अहिले सक्रिय प्रणाली भोलि दिउँसोसम्म नै रहने जलवायु विज्ञ डाक्टर धर्मराज उप्रेतीले बताउनुभयो ।

भोलि दिउँसो पछि मौसम केही सफा भए पनि पर्सि फेरि अर्को प्रणाली सक्रिय भइ देशभर फैलने र बुधवारपछि मात्र मौसम सफा हुने जलवायु विज्ञ उप्रेतीले बताउनुभयो ।

अहिले पश्चिमी वायुको कारण भारतको जम्मु कश्मिरमा एउटा न्यून चापीय अवस्था बनेकोले अहिले नेपालमा वर्षा तथा हिमपात भइरहेको र आसाममा अर्को प्रणाली सक्रिय हुन थालेकाले पर्सिदेखि पुनः मौसम बदली हुने उहाँले बताउनुभयो ।तस्विर:अनिल आचार्य