धादिङमा चैत २५ देखि प्रदेश स्तरीय खेलकुदको लागि खेलाडी छनोट गरिदै

धादिङ,२१ चैत।
दोस्रो बागमती प्रदेश खेलकुद प्रतियोगिताका लागि चैत २५ गतेदेखि धादिङ जिल्लास्तरीय खेलाडी छनौट गरिने भएको छ।

जिल्ला खेलकुद विकास समिति बागमती प्रदेशको आयोजनामा ०८० बैशाखको अन्तिम साता हेटौंडामा हुने बागमती प्रदेश खेलकुद प्रतियोगिता २०७९ का लागि चैत्र २५ गते देखि बैशाख २ गतेसम्म धादिङ जिल्लास्तरीय खेलाडी छनोट गरिने धादिङ जिल्ला खेलकुद विकास समितिका अध्यक्ष प्रताप सिं तामाङले जानकारी दिनुभयो ।

चैत्र २५ गते महिला÷पुरुषको फुटबल र भलिबलको खेलाडी छनोट खेल धादिङबेसीमा हुनेछ भने चैत्र २६ गते पुरुष तर्फको क्रिकेट छनोट खेल बेनिघाट रोराङ स्थित विशालटारमा हुने अध्यक्ष तामाङले बताउनुभयो ।

तामाङका अनुसार प्रतियोगिताको लागि महिला/पुरुष दुबैतर्फ बिभिन्न ९ बिधामा खेलाडी छनोट गरिने छ । जसमा भलिबल, तेक्वान्दो, एथ्लेटिक्स, कँराते, आईटिएफ तेक्वान्दो, ब्याडमिन्टन, बक्सिङ, क्रिकेट र फुटबल रहेको छ ।