ब्रादी युवा क्लवले जित्यो सेमजोङको १३ औं वाका कपको उपाधी

धादिङ,०२ बैशाख ।
१३ औं वाका कप तथा प्रथम अध्यक्ष कप पुरुष खुल्ला अन्तर क्लव स्तरीय पुरुष फुटबल प्रतियोगिताको उपाधी ब्रादी युवा क्लवले जितेको छ ।

धादिङको नेत्रावती डवजोङ गाउँपालिका–३ सेमजोङस्थित वाका खेल मैदान गैरामा आज शुक्रबार भएको फाईनल खेलमा डवजोङ क्षेत्र संरक्षण युवा क्लवलाई पराजित गर्दै स्थानीय ब्रादी युवा क्लवले उपाधी जितेको हो ।

उपाधी जितेको ब्रादी युवा क्लवले नगद १ लाख ५० हजार पाएको छ भने उपविजेतामा रोकिएको डवजोङ क्षेत्र संरक्षण युवा क्लवले नगद ७५ हजार पाएको छ ।

त्यस्तै सेमिफाईनल पुग्न सफल नुवाकोटका बेङरुङ एकीकृत समाज र कन्यास्थान युवा क्लवले नगद १५–१५ हजार पाएका छन् । छार वाका राहा युवा क्लव सेमजोङको आयोजना तथा नेत्रावती डवजोङ गाउँपालिकाको सहयोगमा चैत्र २३ गतेबाट सुरुभएको प्रतियोगिता आज सकिएको हो ।

समुन्द्री सतहदेखि करिब २ हजार १५० मिटर उचाइमा अवस्थित धादिङको सेमजोङ र र नुवाकोटको सिमानामा रहेको उत्कृष्ट पर्यटकीय गन्तब्य वाकाको प्रचार प्रसारका लागि छार वाका राहा युवा क्लवले विगत १३ वर्ष देखि फुटबल प्रतियोगिता गर्दै आएको छ।