धादिङमा प्रदेश स्तरीय खेलकुदको लागि खेलाडी छनोट प्रतियोगिता जारी

धादिङ,१४ बैशाख।
दोस्रो बागमती प्रदेश खेलकुद प्रतियोगिताका लागि धादिङमा जिल्लास्तरीय खेलाडी छनौट प्रतियोगिता जारी रहेको छ ।

बागमती प्रदेश खेलकुद विकास परिषदको आयोजनामा बैशाखको अन्तिम साता हेटौंडामा हुने बागमती प्रदेश खेलकुद प्रतियोगिताका लागि धादिङबेशीमा बैशाख १२ गतेदेखि जिल्लास्तरीय खेलाडी छनौट प्रतियोगिता जारी रहेको छ ।

प्रतियोगिताका लागि धादिङबेशीमा महिला/पुरुष दुबैतर्फ बिभिन्न ९ बिधामा खेलाडी छनोट भईरहेको धादिङ जिल्ला खेलकुद विकास समितिका अध्यक्ष प्रताप सिं तामाङले जानकारी दिनुभयो ।

तामाङका अनुसार भलिबल, तेक्वान्दो, एथ्लेटिक्स, कँराते, आईटिएफ तेक्वान्दो, ब्याडमिन्टन, बक्सिङ, क्रिकेट र फुटबल रहेको छ । आजसम्म व्याडमिन्टन, एथ्लेटिक्स, कँराते र क्रिकेटको खेलाडी छनोट सकिएको तामाङले बताउनुभयो ।

भोलि १५ गते तेक्वान्दो, भलिबल र फुटबलको छनौट प्रतियोगिता हुने अध्यक्ष तामाङले बताउनुभयो ।यसअघि बागमती प्रदेश खेलकुद विकास परिषद्ले गत चैतमा नै जिल्ला छनौट गरी खेलाडीको नामावली पठाउन पत्राचार गरेको थियो ।

धादिङमा पनि गत चैत्र २५ गतेदेखी धादिङ जिल्लास्तरीय खेलाडी छनौटको मिति तय भएको थियो । तर परिषद्ले छनोट नगर्न आव्हान गरेसँगै जिल्लामा खेलाडी छनोट कार्यक्रम स्थगित भएको थियो ।

परिषद्ले पछी फेरी खेलाडी छनौट गर्न पत्राचार गरेसँगै जिल्लामा बैशाख १२ गतेदेखी खेलाडी छनोट प्रतियोगिता सुरु भएको हो।